由王祖藍擔任主持的《有個閨密叫祖藍》本周日（28日）的嘉賓是楊千嬅，千嬅除了暢談與老公、仔仔甚至是奶奶的關係外，更坦率地剖析了自己多年來的心路歷程及性格，內容有笑有淚。
二人獲安排打羽毛球，千嬅又大爆老公是「運動魔人」，即使只是上綜藝節目也當正「真‧比賽」：「有次佢特登train咗三個月先去拍，我提咗佢十次呢個係節目、你只係演員，佢就話自己係運動員。」千嬅說到此處即笑指自己冇嫁錯人。
越講越興奮的千嬅，笑指丁子高經常唔「識撈」，令她哭笑不得：「好似一齊做音樂節目，佢會走嚟話你個音要拉番長少少，跟住我就feel到自己個丹田有火」、「第一日約人飲嘢，通常唔會將人哋所有缺點講晒出嚟呀嘛，但佢就話：『你啲衣著配搭有少少問題，如果我喺客嘅角度會有啲考慮。』」千嬅強調與老公並非一見鍾情，只是越相處越發覺自己深受對方影響，並謂現時在上海居住也是因為老公的上海人身份：「當初嚟係因為佢好耐冇見屋企人，佢屋企大家族嚟，每次食飯都成三圍枱。但我爸爸媽媽喺香港，所以都會掛住香港。」
祖藍追問千嬅曾否行奶奶政策，千嬅即分享與奶奶打牌趣事：「打牌我識識地，但又唔係好識，因為數學真係相當差。初初打我好驚架，奶奶好認真，唔可以亂打。譬如人哋做大牌，但我又唔知亂咁打，結果打出去畀個雞糊截咗人哋一舖150幾番，真係驚過輸架。」
