政府日前宣佈，大熊貓安安和可可很快就可以同大家見面啦！南區民政專員鄭港涌、助理民政專員陳芷羚與一眾南區區議員，本月11日好開心、好榮幸，獲海洋公園行政總裁黃嗣輝邀請，齊齊入園同兩隻超可愛大熊貓見面，親密互動一番！
一眾區議員來到安安和可可居所，安安即刻大步行前歡迎，並很舒服咁瞓落地下攤開雙腳，大大啖咬竹筍，食到周圍都係，大家都話佢非常「麻甩」。再行入啲，就發現細細粒嘅可可匿喺個窿入邊食緊紅蘿蔔。
可可見到咁多人嚟探佢，畀我哋嘅誠意感動，好優雅咁行出黎，坐上為佢特設嘅寶座，一邊細細啖品嚐美食、一邊用眼神含羞答答咁同大家交流。同一時間，安安驚我哋悶，即興表演「功夫熊貓」，雙手撈起成堆竹葉，「狂風掃落葉」咁一邊揮舞、一邊大啖食，引嚟大家發笑同鼓掌。
「家訪」完安安可可後，大家就踴躍在精品店購買各種熊貓手信，買啲可愛熊貓精品送給家企人同朋友。每人拿著一袋一袋戰利品，大讚抵買。
行程最後一站，一眾區議員去到海洋公園咖啡店，品嚐各款熊貓主題甜品同泡沫咖啡，味覺視覺雙重享受！
安安、可可已經適應在香港的生活。牠們能夠快速適應新環境，全賴海洋公園幾位勞苦功高的熊貓飼養員每日悉心照顧，令牠們可以開開心心生活、健健康康成長！
除了可以在海洋公園見到熊貓新成員，未來南區更會有一系列精彩熊貓主題活動！密切留意最新消息！
