蛇年新春即將到臨，往深水埗辦年貨就最啱。送舊迎新，今個星期深水埗各政府部門，分別在北河街街市、仁愛堂美孚鄰舍活動中心附近空地及保安道街市發起一年一度地區管理委員會跨部門「深水埗區歲晚大掃除」。
深水埗民政專員黃昕然、食環署深水埗區環境衞生總監黃偉能多個政府部門代表及多名深水埗區議員，1月9日一齊去到長沙灣保安道市政大廈附近的大街小巷視察環境，跟進順寧道一帶街道衞生、路面雜物同埋建築廢料的最新情況。
各人又同市民交流，派發宣傳單張同賀年福袋，呼籲大家注重環境衞生，一齊將深水埗區打掃得更加清潔乾淨。清潔龍阿德都有到場支持，各人同街坊都有與他打招呼。
蛇年將至，深水埗區內各大政府部門轄下的場地，包括公眾街市、遊樂場、公園、社區會堂等，都會加大清潔力度，等大家可以一齊乾乾淨淨喜迎蛇年！民政處會繼續協調統籌跨部門聯合清理行動，環保署同運輸署等都會加強巡查，減少各種滋擾。
深水埗民政專員黃昕然表示希望凝聚各方力量，鼓勵市民積極響應「歲晚大掃除」，由家居清潔做起，為保持社區環境衞生出一分力。
