無綫劇集《下流上車族》開播以來叫又叫座，昨晚在8號風球下再破收視紀錄，取得26.8點收視，觀眾逾174萬，較上周三同時段驟增5.5點，是今年四月以來翡翠台播出劇集單集收視之冠，下星期進入結局篇，越戰越勇，看來結局有30點也不難，而林敏驄更傳出有望成為今年的民選視帝。
昨晚一集講到志明（林敏驄飾）得悉上司丁友善（袁文傑飾）對芊芊（郭柏妍飾）有意思，護女心切的他在超市當眾出手打友善，導致友善手指尾受傷，雯慧（江美儀飾）為志明向友善求情，惟志明堅拒道歉，更掹着友善耳仔嗌「唔撈」，非常霸氣。之後車氏夫婦在街上爆罵戰，被惹怒的雯慧更忍不住出手掌摑志明。
這場火爆的罵戲原來一Take過過關，談到二人均異常投入，美儀姐笑謂：「想打佢好耐喇，拍呢場戲一啲難度都冇，我對住佢火都嚟，打唔中佢仲火呀，哈哈！」問到是否出盡全力打驄哥，驄哥即搶答：「佢梗係啦，事前仲買咗個雞髀食埋先打，驚唔夠力呀！」美儀姐聞言即大爆笑料反擊，指驄哥拍攝期間被認錯做蔡楓華：「有個姐姐話好鍾意睇佢做戲，問佢係咪蔡生，我話邊位蔡生？個阿姐話蔡楓華吖嘛！」
