2020年港姐季軍郭柏妍 （Rosita） 入行短短幾年已獲不少好評，除了曾奪飛躍進步獎之外，在多套劇集中獲派有發揮機會的好角色。
熱播劇《奪命提示》中，既有打鬥戲分又要講大量專業術語，經常穿短褲短裙更獲網民封為「腳柏妍」，相當搞笑。
戲中Rosita與丁子朗有感情線，她更獻出熒幕初吻，笑說想不到拍攝親熱戲如此多步驟：「幾時除衫、隻手擺邊、眼望邊度，真係好緊張。不過因為太多細節要記，都理唔到係咪初吻。」
講到現時晉身女神，郭柏妍笑說中學時是四眼宅女一名，曾想過「無人要」，雖然拍拖經驗欠奉，但她不心急拍拖，唯有狂煲劇提升戀愛經驗值。
文：陳偉立 圖：Bowles Chan 服裝：@myaleshia
無綫女藝人郭柏妍 （Rosita） 2020年參選香港小姐競選贏得季軍，憑藉可愛臉孔及高䠷身材，星途一帆風順，很快就獲安排參演多套劇集。2022年郭柏妍在台慶劇《下流上車族》中飾演「車芊芊」一角，角色討好被網民封為「女神」，更憑此角色於《萬千星輝頒獎典禮2022》首次打入「最受歡迎電視女角色」及「最佳女配角」最後五強，最後贏得「飛躍進步女藝員」獎。最近她在熱播劇《奪命提示》中飾演警隊兒童心理學專家，戲分吃重，大有機會人氣再度上升。
拍打戲周身瘀 苦練射擊克服槍聲恐懼
郭柏妍在《奪命提示》中經常穿短褲仔上陣超搶鏡，修長美腿令她獲網友改名做「腳柏妍」，非常搞笑。劇中她不乏動作戲，戲服又多數是短褲，所以拍攝期間其中一個煩惱就是要不停補妝遮掩瘀傷。
郭柏妍予人形象斯文可愛，完全聯想不到她可以做打女，此劇最大挑戰絕對是拍攝揸槍及打鬥戲分，她表示壓力甚大：「我身手可以話有啲笨拙，所以事前要上堂學搏擊。我亦好驚槍聲，要花一段時間克服，迫自己日日聽槍聲。我驚嘅程度係會成個人彈起身跑走，但我角色係警察，唔容許我驚，所以一有時間就捉住武指練揸槍。特別多謝武指姐姐維維，佢好細心咁教我，我覺得拍動作戲受傷同辛苦唔係最大問題，係唔想拖累其他人，一個人做錯一個動作可能要全部人由頭拍過。記得有場動作戲拍攝時生病了，我都要死頂拍完，因為唔使影響其他人。呢個都係一個好好磨練，好似真正的警察病咗都一樣要頂硬上執行任務。」
專業對白超高難度 前輩敬業精神大開眼界
郭柏妍眼見其他年資較深的演員，例如主角陳山聰、張振朗、劉佩玥 （Moon） 等都不分晝夜投入拍攝，好像不懂得累一樣，說自己大開眼界：「整個團隊都好努力，監製Jazz （文偉鴻） 指示又好清楚，所有鏡頭都拍到超靚超有型。（同劇跟哪位演員合作最深刻？） 我同山聰、Moon、丁子朗對手戲最多，佢哋都好幫我，同我分析每場戲點做。我諗Moon係另外一種輔導，拍攝時我喺頒獎禮得獎無幾耐，我其實懷疑緊自己值唔值得有獎，感覺上仍在迷惘中，Moon睇得出我唔妥，會主動安慰我同鼓勵我。」
她又指另一個挑戰是對白複雜冗長，因為要飾演一位心理學專家，對白有很多專業用詞，要額外花時間苦練。
獻熒幕初吻 超緊張唔敢睇Playback
感情線方面，郭柏妍繼《下流上車族》與丁子朗飾演一對後，今次再度合作飾演「鬧交CP」，兩人由歡喜冤家慢慢發展成伴侶，郭柏妍更要奉獻出螢幕初吻。
郭柏妍坦承該場戲難度甚高，是一場幻想戲，既要主動色誘男方又要看着鏡頭「示威」，令她緊張炸烈：「第一次拍親熱戲，好緊張。睇劇本都唔太知點做，首先拍攝之前唔敢食奇怪嘢，到排戲時發現原來有好多步驟，幾時除衫、隻手擺邊、眼望邊度……好彩監製、助導親自落場教一次動作。劇情我要演得好壞，要坐喺男方身體上色誘，因為係人哋幻想世界入面，我同丁丁有好多身體接觸，真係唔太習慣。不過因為太多細節要記，都理唔到係咪初吻，純粹想快啲拍完，所以唔係太尷尬。不過拍完之後唔敢睇Playback。」
《奪命提示》其實是兩年前拍攝，郭柏妍笑說這兩年間都有拍攝過一些親熱戲，現在已比當時豁出去很多：「我努力一路突破自己心理關口，之後都有拍過親熱戲，合作對手都好好，會幫我遮穿崩位。」
四眼怕醜宅女 狂煲愛情劇當拍拖
郭柏妍入行初期自稱「A0」，即未有戀愛經驗，近年只跟劇集拍檔丁子朗傳出過緋聞及被指暗戀歌手洪嘉豪。她接受訪問時笑說自己中學時是大近視四眼妹一名，又不懂打扮，因此毫不起眼，更沒有男生追求：「唔少同學放學走咗去拍拖，我就無人約，只好返屋企做功課。（會不會「人有我有」都想拍拖？）又冇喎，我細個唔靚，覺得無人會要我，應該都結唔到婚……阿媽有問我做咩成日唔出街，就算畢業之後出來工作，星期六日放假都係匿喺屋企，好宅，阿媽都擔心我有社交問題。」
問到女神心目中的男神類型？她笑說每追一套劇就會換一名男神，最喜歡看韓劇，因為普遍韓男都較高大，但揀男友就未必會看重外表，反而性格更重要。對方一定要接受她的演員身份，願意配合生活習慣，並且要夠大方：「唔好發脾氣，我好怕人好易嬲，EQ要高。（心急拍拖？）唔會啦，依家要先把握工作機會，感情係你就係你。」
對於有演藝前輩認為多拍幾次拖，累積人生經驗可幫助提升演技，郭柏妍笑說：「我唯有睇劇盡量模仿。幾日睇完一套劇，就感受完一段戀愛，好似速食咁，再放入自己的演戲中，無辦法啦，我要花好長時間去了解一個人，唔係咁容易話拍拖就拍拖。」
小時候偷偷煲劇 設計引媽咪陪睇電視
郭柏妍入行後機會不斷，星途順利，更早早有獎項加持。她說自己小時候是怕醜妹，從未想過長大後會踏入銀色旅途：「我覺得上電視係一件好勁嘅事，我唔識扮靚又無咩自信，無想過第日會拍戲。（完全無表演慾？） 讀中學時有參加過劇社，但因為怕影響學業，唔敢參加得咁密，所以無咩戲分。」
郭柏妍自認小時候是劇迷，但礙於家庭管教頗嚴，不准她晚上開電視，所以特別珍惜父母未回家的六點鐘重播時段：「趁屋企人未返到，我六點鐘一定開電視睇劇，所以睇咗好多舊劇重播，好似《十兄弟》、《無頭東宮》、《封神榜》等等，係我小時候最開心的私人時間。之後我特別鍾意佘詩曼、李施樺，於是諗招數點樣黃金時段都有得睇。好似《宮心計》那段時候，我八點半『唔覺意』開着部電視，吸引媽咪留意，如果佢都有興趣，我就有得一齊睇。」
參選港姐改變命運 宅女變身熒幕女神
由宅女搖身一變成為劇集女神，2020年參選港姐改變了郭柏妍的人生。她表示全因母親鼓勵，因當時已是空姐的她身體受傷，未能符合工作條件，加上疫情關係，令她重新思考未來發展，於是母親提議她參選港姐，可以擴闊眼界及認識更多朋友。想不到現時郭柏妍非常享受成為演員，每次拍劇過程都積極投入：「呢幾年好幸運演了好多角色，每次都經歷一段人生，仲學到一些新技能，例如呢套劇（《奪命提示》）我練咗搏擊、開槍，另外又學過踩滑板、大提琴，又為台慶練習空中瑜伽，短短幾年經歷好多。」
