在娛樂圈生存並不容易，尤其不是被大公司力捧的一批藝人，最終選擇放棄轉行的多不勝數。
今期受訪的TVB女藝人鄧伊婷 （Irina） 擁有漂亮外表及修長美腿，網上擁有大批支持者。或許礙於並非選美或訓練班出身，她很少有機會擔綱重要角色，多被安排演花瓶或姣精角色，但鄧伊婷仍然堅持把握每次演出機會，不介意被定型，笑言希望可以「姣出一片天」。
文：陳偉立 攝：Bowles Chan 場地：觀塘嚟啦Partyroom
女藝人鄧伊婷加入TVB約8年，演出過的角色種類相當多，包括法證人員、律師、記者、情婦或主角的女性友人等等，但最令人印象深刻的都是姣精、索女、辣妹這類別，她笑言已慢慢變成「姣精專業戶」。正面想，外型要「有返咁上下」才能勝任；但卻很容易被人標籤只有外表沒有演技。
新劇角色「姣得有原因」
近期鄧伊婷在王敏奕及朱敏瀚主演的劇集《虛擬情人》中，飾演索爆拜金網紅「潔伊BB」，她笑說有較多發揮機會，更重要是「姣得有原因」。不是一個只懂片面賣弄風情的角色，當中不乏話題性場口，結果引發網民議論。
她的角色是要用不同方法哄騙宅男金錢，既有色誘亦要心理上俘虜男性：「雖然集數唔算好多，但寫得幾立體，有挑戰性。之前做過好多姣角，被人讚姣得幾好喎……但其實每個人做事都有動機，呢個角色有原因點解要去姣男人，有一些辛酸同感性部分可以演繹出來。」
鄧伊婷又爆料，劇中其中一場戲要穿着兔女郎服裝、魚網絲襪面向鏡頭，挑逗引人課金，意識相當大膽，但最後該段戲被剪走，讓她鬆了口氣。
視法拉與高Ling為奮門目標
講到經常被安排演姣精角色，會否擔心被定型？鄧伊婷坦白說：「曾經有驚過，而且開頭演性感角色有些怕醜，慢慢越來越純熟。既然條路咁樣安排，入咗呢個角色區域，就要盡量做到最好，當你做得夠好，一定會被人看見，自然會有其他事發生。」
她舉例像高海寧、陳法拉，早年都演過一些性感或小三角色，之後都能闖出一片天。鄧伊婷視她們為奮鬥目標，機會留給有準備的人，鄧伊婷深明這個道理。她感覺自己演技上有所不足，早前特地報讀演技訓練課程，希望繼續進步：「進修原因係覺得情感表達上未夠細膩，上堂後發現以前成日好多框框框住自己，有些感情以前唔夠膽面對，練習時爆喊咗好多次，之後好似開竅一樣，解開了心結，發覺自己能夠有更多面向。」
鄧伊婷日後想挑戰更多有難度的角色，例如變態殺人犯、黑社會大嫂甚至喜劇，總之要令觀眾意想不到。
心中男神第一位首選吳尊
講到暫時最難忘的演出，她表示是在劇集《黑色月光》中跟Eddie Pang有場肉搏床戲，不過這位Eddie Pang並非台灣型男彭于晏，而是前EO2成員彭懷安，那是鄧伊婷第一次跟異性拍床戰，心情十分緊張：「佢好紳士，之前兩個溝通好夾好晒位，拍攝時無諗太多，希望盡快拍完，但出來效果幾好。」
問她之後想跟哪位男藝人拍床戲？她笑說當然是另一位Eddie Pang：「一直好欣賞彭于晏，起初睇佢演偶像劇，到佢拍《激戰》練到超大隻，之後另一套戲又要扮到好滄桑，完全放低『偶包』，好值得欣賞。」
講到心目中男神第一位，鄧伊婷首選吳尊，她更誇張地表示，「遺願」是跟對方拍一張合照：「我等緊吳尊，希望佢會出返嚟拍戲，有機會合作。（點解咁鍾意佢？）起初欣賞佢大隻靚仔又有錢，之後睇佢啲著作，覺得佢好有夢想，再知道佢娶老婆係初戀情人，入咗娛樂圈咁耐都咁專一，非常難得。我『遺願』係同佢影一張合照。之前有同佢飛輪海前隊友辰亦儒合作過，我都有同佢講。」
自爆不止一次被「渣男」欺騙
雖然男神都是靚仔大隻類型，但鄧伊婷直言揀男友不會只看外表，反而性格較為重要，一定要善良及有風度。近期她會欣賞懂得鍛鍊自己的男生，認為他們做事通常較有目標及成熟：「性格唔可以小器同計較，外型順眼就可以，如果性格差，幾靚仔都冇用。」
鄧伊婷自爆曾經不止一次被「渣男」欺騙，因此更會帶眼識人，不會被對方外型「電」暈。講到被騙往事，她有段時間交往的一名「渣男」，對方本身已經有女友，但仍然刻意隱瞞扮單身：「開頭唔知佢有女友，到我對佢有感覺，先發現原來一直呃我。真係好似拍戲講對白，佢一直話就嚟分手，拖字訣，我又真係信，依家諗返佢成日講『散緊㗎喇，俾啲時間我』，咩叫散緊？一定係大話。都有傷心過、喊過，Hurt咗一段時間後好彩理性返，決定斬纜，無話戀愛腦繼續錯落去。」
Model辛酸被迫除衫射水
鄧伊婷條件不俗，笑容甜美又有高䠷身材，不過小時候從沒有想過做明星或選美，但在際遇驅使下入行做了模特兒再加入女團，由玩票性質到成為職業演員，一步一步走來，本身沒有甚麽既定目標。
「我細個鍾意唱歌，中學試過參加歌唱比賽，只得到第四，有少少打擊。對住咁多人唱歌有啲驚，所以無諗過做歌手。跟住有位同學有做Model，介紹我做兼職私影，不過唔係性感，係着得好密實，但做咗一次覺得好悶。之後有得影報紙副刊，就覺得好好玩，因為可以去不同地方食嘢，介紹好玩去處，覺得好新奇。跟住慢慢識到其他同行，開始企旺角西洋菜街做Promoter，好感恩一直有工作，當時仲讀緊書，已經有機會拍廣告同行騷，儲落好多唔同經歷。」
提起做Model時期的辛酸，伊婷自爆經常被拖糧，最傷心是有次被朋友游說參加比賽，豈料白做無糧出。另一次深刻往事，是當年在旺角做Promoter，令她委屈到喊：「開頭話Bikini外面可以着衫，跟住有人會向啲防水產品射水。但到真係開工，個判頭改口話唔可以穿外衣，當時我年紀細唔識拒絕，之後啲人係咁對住我射水，我一路開工一路覺得好慘，點解要做到咁Cheap？收工後真係喊咗出嚟。呢件事令我知道要識得Say No，傾工作時要更保護自己。」
女團生涯與林峯齊跳台慶
2012年，伊婷展開人生另一旅程，獲邀加入女團Super Gear，挑戰唱歌跳舞。當時女團被稱為「港版AKB48」，有十多個女生參與。問到她是否會有很多是非，又或者出現爭企位的情況？她說：「咁多女仔一定有是非，我自己無特別理，我只係想玩。記得有一次出活動，隊長好好，叫我企她隔離，點知突然有個隊友『攝』出嚟。我都有點愕然。拍MV嗰次，因為我比較遲入隊，好多時都係企後面或側邊，但我無所謂，因為每個人都會有『大頭』，但睇返原來好多鏡頭真係見唔到我。哈哈。」
加入女團期間，參加過不少表演及頒獎典禮，為鄧伊婷之後的路奠下基礎：「嗰兩年我哋有機會學樂器同跳舞，同期又有其他女團，成個樂壇氣氛都幾好。有年我哋同林峯一齊跳台慶，係好開心嘅回憶，不過維持大約兩年，工作開始少，最終解散⋯⋯到2016年加入TVB算係緣分，因為之前做組合時有機會入TVB拍攝，合作過的幕後朋友幫我介紹。」
下戰書挑戰頒獎禮提名
加入TVB初期，鄧伊婷主要被安排拍攝綜藝節目，例如飲食節目、《姊妹淘》以及令她被更多觀眾認識的《三日兩夜》。
之後鄧伊婷有機會拍劇，由小角色做起，她認為有機會參與《愛·回家之開心速遞》演出，已是一件大事：「起初做過幾次大龍生女朋友，但幾次都唔同角色名，有想過爭取用同一個名，希望扮係長駐角色。點知網民真係記得，留言問點解同一個女仔成日唔同名？原來即使小角色都有人留意。之後被安排做KC秘書，有機會做大家認識嘅Latte。真係做咗長駐角色。」
可能並非透過選美或訓練班入行，鄧伊婷的星途走得比較迂迴，由模特兒到女團，再成為電視藝員，都是因為朋友介紹。鄧伊婷性格較隨遇而安，事業上一直沒有具體計劃，但最近終於為自己設立了一個目標：「希望可以獲得頒獎禮提名，有機會參與頒獎禮爭獎。」愛笑的人運氣都不會太差，性格樂天開朗的鄧伊婷人緣甚佳，祝願她早日達成理想。
後記：「汁汁姐」花名引人入勝
比起「鄧伊婷」或「Irina」，粉絲更喜歡叫她的花名「汁汁姐」，背後意思令人浮想聯篇。
究竟這個花名有甚麽由來？鄧伊婷笑說，全因年前與朋友的一次火鍋聚餐引起：「個花名來自於一瞬間……有次打邊爐，有朋友指住我個身講『你滴左啲嘢』……我答：『係喎，滴咗滴汁汁添』。不知何解朋友聽到覺得好好笑，可能好少聽人這樣說話，於是第二日個個都叫我汁汁，變成了花名。」
其後鄧伊婷玩網上遊戲，由於特別喜歡「執雞」，被朋友笑她「汁頭汁雞」，於是她決定以「汁汁姐」這個綽號成為網名：「前幾年TVB有個傳說女神育成計劃，我哋幾個女仔返公司同網友打機，我就用呢個網名，跟住開始多人咁叫我。至於『汁汁姐』點樣發揚光大？係之後我參與了網上平台『巧鬆啲』的拍攝，拍啲少少鹹多多趣的搞笑節目，有個綜藝小劇場，當時都幾受歡迎，好多人睇。我演出的Partner叫KY哥，好多網友覺得很有趣。其實當初我唔係咁喜歡『汁汁姐』個名，好似好奇怪，但發現多人鍾意，又會引起更多人的好奇心，想辦法去了解我，令我都鍾意咗個花名。」
