樂隊Mr. 結他手黎澤恩（Ronny）近年多了一個演員身份，拍攝過多套無綫劇集，最近在《刑偵12》飾演張振朗的暗黑人格，瘋狂誇張演出超搶眼，獲網民一致激讚。
早年新冠疫情對黎澤恩打擊甚大，樂隊工作全面叫停，幾乎冇錢交租，更捱住腳痛去帶客睇樓，令他不禁痛駡自己：「點解可以咁廢？係咪無咗隊Band就咩都唔掂？」一步一步捱過去，走出陰霾的黎澤恩事業重回正軌，演員身份獲得認同，Mr. 最近又以新形態舉行巡演……
只要不放棄，堅持就是勝利。
文：陳偉立 攝：Bowles Chan 場地：WarmdParty
無綫劇集《刑偵12》早前播出引起一段熱潮，網民對劇集全員演技高度評價，除了視帝林保怡、張振朗及傅嘉莉之外，兩位主角的一眾「人格」都各有搶鏡機會。當中飾演「刑凱」（張振朗飾）暗黑人格「薩尼」的黎澤恩，憑「深紅色眼袋」及「超邪惡笑容」贏盡關注，人氣急升。
參考死神流克 刻意誇張演出
講起黎澤恩，大部分人首先會想聯想到樂隊Mr.。作為樂隊多年的節奏結他手，經歷過紅館開騷及疫情無工開的極端日子，2020年他加入邵氏轉型做演員，迎來事業「第二個春天」，在劇集《新聞女王》 飾演「賊王」、《反黑英雄》飾演「泰仔」高高，甚至客串《愛．回家之開心速遞》都得到觀眾留意。
今次《刑偵12》中的暗黑人格是相當難演的角色，他之前花了大量時間做功課，希望跟一般奸角的演繹有分別：「我唔認同係一個奸角或者反派，佢係一個人腦入面暗黑面，係主角童年陰影迫出嚟。我唔當係人咁演，係一種氣氛或者精神。收到劇本之後盡量搵模辦，想像到係《死亡筆記》嘅死神流克，無分善惡，係好純粹憎恨同不滿。當我腦中有呢個影像，就可以好誇張咁做，瞪大對眼、講嘢有氣聲、笑得誇張……個角色係我演戲以來最複雜，所以雖然我係第19集先真正出場，但我要由第一集劇本開始睇，了解刑凱點會有人格解離。」
劇集播出後，不少網民留言讚他演技出色，沒有被張振朗比下去，還指他「越奸越型」。對於獲得讚賞，黎澤恩謙虛表示一半是夠運氣，可以遇到這角色，另一半歸功於同劇主要對手張振朗。他大讚張振朗毫無架子，任他自由發揮。講到有幾場兩人「神同步」演出，不論表情動作抑或對白都要一模一樣，兩人雖然是來到拍攝現場才磨合，但比想像中有默契：「振朗好信任對手，容許大家即場改動，如果佢限住我就一定冇依家咁好睇。好開心同佢拍檔，當然監製導演都好大功勞。」
拍打戲最辛苦 內疚誤傷對手
除了文戲有得發揮，黎澤恩還要挑戰多場打戲。音樂人「突變」武打演員，黎澤恩形容過程相當困難，拍攝時更有發生意外：「有一場戲我同張振朗、吳業坤三個『人格』互毆，爭奪身體控制權。記得是在去年7月11日，我生日那天拍攝，又濕又熱非常辛苦。另一場戲係我同張松枝在貨櫃場對打，呢幕係兩個黑暗『人格』對決，相信觀眾最想睇。但我無太多拍打戲經驗，打戲其實好多借位，我就真係唔識就位，一拳打到武師個鼻，當時聽到『啪』一聲，對方即時流鼻血。我好內疚， 成世人都無打過人塊面，所以以後每次拍打戲都要好小心。（想做武打演員？）無，年紀有返咁上下，好易受傷，當然角色需要就一定會演好。」
童年黑暗往事 被變態叔叔非禮
《刑偵12》中，兩位主角都因童年創傷經歷，導致出現「人格解離」。其實世上所有人或多或少都有暗黑面。問黎澤恩是否也有童年陰影？他表示成長期間家庭和諧，沒有暴力問題，最多只是父母經常外出工作，留他一個在家中。但說着說着，黎澤恩分享了小時候一件可怕往事，到今時今日仍然記得。
黎澤恩曾祖父是外國人，他帶有點混血兒外表，加上很遲才長高，青靚白淨細粒外型，竟成為變態叔叔的獵物。
「好似係初中，有次放學坐火車，我企玻璃隔離，突然有個變態佬埋嚟，用手掃我下體，好明顯係非禮。可能佢鍾意細路仔……呢啲回憶真係好恐怖。另一次我被一個男人跟蹤，由落巴士跟到屋企附近，我發現咗佢，同佢對峙咗五分鐘，最後成功脫身。可能我細個太得意，生得比較細粒又青靚白淨，14歲前都經常被人認錯係女仔，如果早生鬚應該無事……當然這些經歷唔會令我人格解離，但如果一個小朋友長期被人非禮或者虐待，就可能會累積成為創傷。」
人生曾陷低谷 靠津貼過活
2019年新冠疫情爆發，影響全球所有人，亦令黎澤恩的事業大所打擊。
樂隊Mr. 2008年成立，曾經紅極一時，出道數年間連開三次紅館演唱，當時黎澤恩正是成員之一。2016年與唱片公司約滿，樂隊曾經沉寂幾年，直至2019年重新出發。當年五月Mr. 即舉辦紅館音樂會，更計劃四出巡唱，前景一片美好。然而人算不如天算，10月疫情爆發，工作被迫叫停，黎澤恩形容這是他生命中最難捱時刻。
「突然間無晒演藝工作，買股票又輸，又要交租俾家用，身體更加出現問題，椎間盤凸出令到左腳行唔到。我有去做地產經紀，一拐一拐咁帶人睇樓。有半年時間隻腳會好似突然觸電。當時覺得個天玩得我幾透，好唔開心，無咗隊Band好似咩都唔掂，又搵唔到食。點解可以咁廢？真係今個月唔知下個月事，有時要靠演藝人協會津貼，有幾千蚊頂住，最後終於慢慢捱過。」
經圈中朋友介紹下，2020年底黎澤恩簽約邵氏嘗試做演員。
「自細喜歡睇戲，又會特別去欣賞一些配角及群眾演員的演出。想不到以前看過的戲，可以成為今天做演員的參考。我可以一日睇兩、三套戲，好鍾意留意演員啲『微表情』以及後面啲配角……如果連配角都演得好，成套劇就有返咁上下質素。」
反派專業戶 渴望有感情線
拍戲這幾年，黎澤恩似乎演反派角色比較凸出，監製亦喜歡找他演反派。縱使如此，他也不怕會被定型：「都係好事，起碼有人認同，好過唔知做咩。其實做反派好好玩，可以做啲意想不到嘅事，正派唔可以亂來，但奸角搞破壞好正常。」
不過他遺憾這幾年拍劇仍未試過有感情線，他渴望演暖男或爸爸角色：「我個樣唔係真係咁壞呀？唔一定要打打殺殺開槍。（想同邊個拍？）無所謂，咁諗就會有私心，但希望對手係好玩，大家交流到。好似彈結他，如果對手好緊張，我都會被影響；如果對方勁投入，大家自然更加Enjoy。」
自嘲一把年紀才轉行做演員，黎澤恩未敢奢望得到甚麼獎項，但會盡力演好每個角色，繼續長演長有：「我哋樂隊得過好多獎，知個感受係點。比起得獎，得到觀眾認同先係更重要。我自知無資格做主角，但好似去一間西餐廳，主菜固然要好食，但如果連個湯都好飲，蒜頭都燒得好香，間餐廳就有水準。我希望成為好好嘅配菜（配角）。」
Mr. 重新出發 4子享受巡演
黎澤恩中學時受殿堂級樂隊Beyond影響而愛上音樂，但他從未真正上過樂器課程，靠自學練得一手好結他。入行前，他會隔晚到尖沙咀文化中心或沙田中央公園跟其他樂手偷師，其後認識了Mr.其他成員，再被唱片公司賞識簽約，踏上了改變他一生的演藝路。
經歷高高低低，近月Mr.打算再出新歌及開巡迴演唱會，到不同城市開騷。黎澤恩表示會好好兼顧樂手及演員身份：「我心目中，Mr.同我自己嘅嘢永遠共存，好似人格咁。Mr.同演戲係我兩個人格。我哋無放棄過音樂，一直都有做巡演。」
對於4人（原本5人）重組，主音布志綸 （Alan）消失了，黎澤恩認為Mr.不是以人數決定，而是一種精神：「計劃係要開心玩落去，有Show繼續做，表演經典歌之餘亦會創作新歌。出面好多聲音，有人話我哋變咗，四個唔同咗；但好高興仍有一大批歌迷繼續支持。」
後記：我哋都無時間再浪費
人生閱歷越來越豐富，黎澤恩待人處事更成熟，跟樂隊成員相處方式亦和以前有所不同，最重要是希望兄弟情能繼續走下去。
「以前我係咩都會忍，好少表達自己不滿。依家大個咗會直接啲，因為我哋都無時間再浪費。好似拍拖，唔好成日咩都收喺心入面，慣咗唔表達只會谷親自己，講出自己想法無問題，用咩態度表達先係重點。有時鬧下交唔緊要，成熟嘅人要識得審視自己，係咪自己都有問題？我性格轉變可能因為入咗TVB，見到外面更多人，個人放開咗，識得適當時候表達自己。」
