發哥（周潤發）鍾意行山係人都知，他時不時會帶住部相機通山走，既可以舒筋活絡又可以隨機攞景，生活不知幾優悠。喜歡行山的朋友亦不時會捕捉到「野生發哥」，要求合照時發哥都會很樂意，親民指數爆燈。
一個人行山非常危險，所以發哥都有好多行山腳，與朋友結伴行山有傾有講，又可以互相照應。昨日（9月3 日）阿蘇（蘇施黃）就在IG及Facebook都曬出了她與發哥行山的照片，估不到兩人是行山腳，更估不到的是，阿蘇發的行山照竟然係「零風景」，反而全部跟食有關。
阿蘇帖文咁講：
「個木咀真係痴（癡）痴（癡）地，行完山話帶我去食大排檔，我以為食吓乜乜湯通……
未坐㡳（低），佢問我食乜嘢飯。早晨流流食飯？佢話硬（梗）係早晨食飯，晚上唔好食飯，結果我叫了排骨飯$16 又平又好食。我放底（低）碗筷，佢話唔食嗱？剛開始咋喎！
之後食了清渴（湯）腩河、云（雲）吞蝦子撈麵、咸（鹹）牛肉旦（蛋）三文治、西多。果然為食運動！」
嘩！估不到兩人都是食得之人，行完山食個早餐都如此豐富。不過這裏要奉勸兩位一句，運動完喪食好易會有脂肪積聚，兩位年紀都有返咁上下，記得要保重身體呀！
