萬千星輝2022 陳山聰奪視帝江美儀封后附得獎名單

無綫《萬千星輝頒獎典禮2022》昨晚圓滿結束，視帝由大熱的陳山聰奪得，視后則由江美儀憑《下流上車族》「慧敏」一角勇奪視后，同劇的林敏驄失落視帝，最佳劇集由《下流上車族》奪得，聰哥直言「寶物沉歸底，識玩緊係贏個大。」對於被指爆冷奪后的江美儀，首嘗視后滋味，上台即泣不成聲，直言冇想過會攞獎，因不是親生女。

出爐視帝陳山聰入行30年，今年晒冷式推出6部劇集，其中有3部作品打入視帝候選名單，最終以《金2》出戰並勇奪視帝寶座，穿上白色西裝的他，率先贏得「最佳衣着男藝人」，及後再下一城奪視帝，領獎時含淚說：「我嘅人生馬拉松入面，最困難係點樣由失敗企番起身！」事後接受傳媒訪問時表示要多謝老婆：「頭先喺台上面真係好匆忙，多謝佢10年來喺後面，support我，無怨無悔從來都無半句怨言，拍戲幾忙佢都默默支持我，直至生咗小朋友，畀咗個咁幸福嘅家庭我，令我無後顧之憂，我覺得佢功勞係最大，呢個獎係屬於我哋一家三口。」

江美儀得獎時激動落淚：「我冇諗過會攞到獎，首先我要多謝TVB頒呢個獎畀我，我以為自己唔係親生女，唔會攞到呢個獎﹗陳煒，我哋好爭氣啊﹗多謝《東張西望》，原來我同《東張西望》講想爸媽來，就有4張飛畀我﹗上次我攞『最佳女配角』，佢哋冇嚟到，我覺得好遺憾。今次佢哋見證我攞最佳女主角。」

對於《下流上車族》奪最佳劇集，上台攞獎的林敏驄笑說：「個人嘅榮辱好小事，識我嘅梗係攞終極大獎﹗」林敏驄表示能參與《下》劇，令他感到很驕傲，隨後多謝台下的高層曾勵珍和曾志偉。他又取笑江美儀「著到烏雞咁」令全場捧腹大笑﹗林敏驄續說︰「做視后呀﹗今朝食咗幾粒『視后丸』，以為惡補一吓。」江美儀聞言哭笑不得。
江美儀事後笑言：「最緊要靚。（佢話妳食視后丸。）唔係，我事前事後都有食，食維他命C。」

圖：中通社