藝人馬德鐘、湯洛雯（靚湯）、何廣沛等今日為無綫新劇《雙生陌生人》進行拜神儀式，劇中靚湯與一人分飾兩角的馬德鐘有超多對手戲，是對方的初戀情人，不過靚湯自爆二人在劇中雖屬戀人，但就未有親熱戲，問到是否怕男友馬國明唔畀拍？她笑住否認：「如果劇情需要都會拍，佢一定唔會唔畀，公司啲尺度唔會大得去邊，我亦冇要求佢唔好拍，但自從我拍拖之後都真係冇拍過錫戲，如果拍嘅話之前會講聲。」對於上次和譚俊彥拍攝火辣的激咀戲，靚湯表示拍攝時並未和馬明拍拖，至播出時，馬明用「9秒9睇咗。」
靚湯於本周四（6日）34歲生日，男友馬明又剛剛好拍畢《白色強人II》回港，問到她會如何慶祝？她表示會在香港一日遊：「嗰日暫時可以放假，想去行吓山、去主題樂園、Staycation。」（男友返港陪你更開心？）她說：「一向都開心，之前馬明返內地拍劇，呢段時間有視像聯絡神交。」
圖: 中通社、互聯網
