TVB台慶劇《星空下的仁醫》進入結局篇，昨晚（15日）Eman（鍾嘉欣）因胎兒保不住而流產，兩度爆喊，看得人心酸動容，鍾嘉欣的演技更被不少網民評為視后級數。劇情講到鍾嘉欣突然下體出血，要做手術，可惜確診感染病毒所以救不到BB，鍾嘉欣雖然一度心跳停頓，幸好成功搶救，而鄭嘉穎做手術剖腹取出連住臍帶的BB，過程和BB道具都相當迫真，據知，BB道具造價達5位數，可謂相當揼本。
鍾嘉欣手術後甦醒，見不到兒子，最終鄭嘉穎告知其兒子已離世，鍾嘉欣爆喊：「對唔住呀！媽媽害死你呀！」真是聞者心酸，鄭嘉穎指是自己失誤害死BB，之後兩人真情對話，鍾嘉欣承認自己有幻覺，並傷心地表示知道是時候放下兒子：「我唔想自己咁清醒，佢之前仲喺我個肚入面，我連同佢Say聲Sorry都冇機會。我好掛住佢，好掛住BB呀！」單是兩場喊戲，已成功演繹了多種複雜情緒，難怪網民話「睇到心都實晒」。
嘉欣越洋受訪時大表感謝，又坦言做媽咪後對演喊戲有幫助：「學套劇話齋，媽咪是有一種本能，我的本能就是更加connect到我自己的內心世界同情緒，即是痛可以更痛。」
