37歲洪永城（Tony）與梁諾妍(Inez)這一對今日正式在社交平台宣布結婚的喜訊，兩人自2018年拍拖以來，屢傳婚訊，雖然例牌否認，但今日Tony和Inez終於各自在社交平台上載婚照，有情人終成眷屬。
洪永城上載的婚照見到兩人身穿行山look，雙手緊握在一起，Inez手上拿着一小束小白花，狀甚溫馨，他寫道：「由一齊跑步、到傾電話、睇日出、拍拖、不計劃的旅行、到扮攰逃避跑步、通宵睇動漫、同居、到我們至愛Coco離世、到開工連晚安早晨都沒有機會同你講、到今日一齊攜手踏上我倆的新旅程好在有你，緊握我手我希望一世都有你在身旁追到你是我的僥倖，娶到你是我的福氣Let’s get Married！」
另一張結婚照則見洪永城以白T恤配煲呔，Inez以背心T恤、 短褲加波鞋，兩人手拖手在運動場上興奮地跳起：「下半生手拖手，繼續一起跑下去，繼續跑去世界每個角落，感恩遇到你，常常帶給我歡樂，照顧我陪我通宵睇動漫睇網球比賽，工作上的互相扶持願餘生我們也要一起笑住過！#我們結婚啦 ！」
談到求婚過程，Inez坦言求婚過程在洗手間發生，「求婚過程好好笑，好多蝦碌嘢發生，佢喺屋企個廁所度求婚，我覺得好好笑，不過好係佢嘅 style，成個過程我係笑到喊，不過都好感動，有晚佢拍完嘢返屋企，就入咗厠所一陣出嚟，跟住到我人有三急入厠所，佢又跟住我入廁所，當我打開廁所門，原來佢喺廁所度佈置咗有一個攝錄機，又喺洗手盆度放咗啲微型燈泡，又有一束鮮花，鏡上又貼咗啲心型卡，仲寫上MARRY ME？我好笑又感動，我問佢點解要喺洗手間求婚？佢話知道我一定會去洗手間，最好笑係佢拎隻戒指出嚟求婚時候，我話我真係好急，你等一等我去完廁所先，結果佢要等我辦完大事再求婚，我就Say Yes！」
洪永城今日回覆傳媒查詢時表示，今年初已求婚成功，目前正籌備婚禮，計劃在今年內舉行，確實日子會稍後公佈。
