銅鑼灣SOGO崇光門外7.1晚上發生刺警案，遇襲受傷的28歲警員，情況已轉為穩定，繼續在瑪麗醫院留醫。而50歲兇徒梁健輝當晚在現場用刀自插胸口，最後不治。保安局局長鄧炳強說，有人企圖英雄化疑兇，有人稱兇徒為烈士，又帶同年幼子女到案發現場獻花，是企圖繼續煽動仇恨、鼓吹暴力等，他強烈譴責在背後美化恐怖主義及鼓動更多人作暴力行為的人，令他感「心寒」，更質疑是否想下一代「全部都變成嗜血嘅恐怖分子呢？」
鄧炳強今早出席「百年偉業——慶祝中國共產黨成立100周年大型主題展覽」開幕式後見記者，主動提到見到有家長帶年幼子女到現場「去悼念一個、呢個咁嘅恐怖分子，其實睇到之後呢，我覺得非常之心寒，究竟係咪想我哋下一代，全部都變成嗜血嘅恐怖分子呢？」
鄧炳強指出，本港暴亂後，兩年之後有「得來不易」的平穩，「香港市民係可以繼續過返正常嘅生活，我哋係咪想畀呢啲、唔想香港安寧嘅人，背後推手出嚟，係令到我哋繼續互相仇恨。」他強烈譴責在背後「美化恐怖主義」及鼓勵暴力的人，政府上下會攜手同心打擊「恐怖活動」及「鼓吹恐怖活動」的人，「希望社會各界認清事實，認清邪惡勢力喺背後不停想煽動仇恨，想在香港「孕育恐怖主義」。
鄧炳強指，在網上進行的犯法行為，「你鼓吹暴力、叫人犯法，你就係犯法。」執法部門會「盡全力將你揪出嚟，送進去監房。」他續指，現行法例有打擊恐怖活動、國安法、其他刑事條例等，「一定會用好所有法例。」獻白花是否犯法，鄧炳強指，在現場要看獻花行為，會否引致社會混亂，或者其他違法行為。
鄧炳強最後表示，「如果你話因為警察捉賊，所以啲賊犯法，你警察唔捉賊，咪無人犯法囉，呢個係完全本末倒置，好多人就係想用呢啲歪理、假道理，蒙騙社會人士，鼓動佢哋出嚟犯法，為佢開脫犯法行為，我覺得我哋所有人都有責任向呢啲歪理說不，呢啲全部都係背後嘅推手。」
