反對修訂《逃犯條例》風暴持續至今逾4個月，仍未有平息跡象，示威者在各區大肆破壞、縱火、堵路，戰線由街頭一直伸延至港鐵站、商場店舖甚至住宅區，負責維持港鐵車站服務的前線人員及維持商場、住宅治安的保安員，首當其衝慘成事件中的「磨心」，接連發生被示威者包圍聲討，甚至襲擊受傷等事件，淪為「政治犧牲品」。
有港鐵職員申訴前線員工在車站內被示威者圍堵時，飽受驚嚇及侮辱，質疑「點解有訴求嘅人要落喺我哋身上去負責找數呢」？甚至要面對因汽油彈攻擊而無路可走的危險。
保安業界更指，前線保安員慘受示威者、住客及警方三面「夾攻」，更要冒着孭上阻差辦公罪名風險，打工變得亳無保障。
文：陳 明 圖：黃智峯（部分）
暴徒打爛設施發洩 港鐵職工飽受驚嚇與壓力
「以前話地下鐵路話咁快就到，個個好信任我哋公司，可以預到時間，但係呢次，搞到乘客大失預算，我哋又唔好意思，但係又好無辦法……點解香港會發生啲咁嘅事？自己香港人去對付香港人！」港鐵石硤尾站站務主任Winnie向記者坦言，任職40年來從未遇過這種事。她認為，示威者可能認為港鐵偏幫警察，但其實警方是絕對有權進入站內執行任務，《港鐵附例》亦清楚寫明。她慨歎：「差人做咗佢哋（示威者）出氣對象，整整下連我哋都拖埋落水！」
葵芳站：長時間被困站長室無廁所用
本身是港鐵員工代表之一的Winnie，由示威者在港鐵發起不合作運動，至近期嚴重破壞車站設施，不斷有同事向她講述遭遇及訴求，從中感受到同事飽受驚嚇及壓力：「因為突然之間有好多人入嚟個站，蓄意去做一啲令同事措手不及嘅動作或行為，最初真係估唔到咁混亂，嚇得同事好緊要，有啲話唔想返工，真係好大壓力。」
其中葵芳站在「8.11衝突」中，有警員在站內施放催淚彈，引起市民不滿，事後數百人一度包圍車站控制室要求站長交代，事件擾攘至深夜。Winnie指，事後有站內員工向她表示，當晚所有同事被困在站長室內，長時間缺糧缺水，最慘是站長室未有連接洗手間，令被困的同事不能上廁所：「男同事可能搵啲樽都搞得掂，女同事忍得好辛苦，卒之要搵個垃圾桶嚟搞掂。」她哽咽說：「我覺得好唔開心，好肉痛啲同事受到咁無情嘅侮辱，有無咁嘅必要先？咁多個鐘頭去唔到廁所真係好慘。」
黃大仙站：職員返工抬沙包阻隔積水
而位於戰區核心的黃大仙站，本月初有示威者堵塞龍翔道後，扭開路邊的消防水龍頭，讓水柱直噴入黃大仙站，令站內水浸。該站同事向她說，翌日返工要抬30個沙包阻隔積水：「佢同我一樣做咗40年，未試過咁樣，無論上上下下都好辛苦。」
至於她工作的石硤尾站，受到的衝擊則相對較少，較為驚嚇的一次，是一班示威者在深水埗做完行動後，礙於深水埗站已封站，遂走到石硤尾站乘車離開：「佢哋由頭黑到落腳，成班咁衝埋嚟，好似啲軍隊咁，啲細路仔都嚇到喊，有啲客就唔敢同佢哋一班車，寧願落車搭下一班。」
還有一次發生在本月初，她看到一名中學生跳閘逃票，上前查問卻不獲理會，逃票者更隨即乘電梯往月台離去，她惟有叫該名學生下次要記得購票入閘：「公司叫我哋要安全第一，太多人就唔好走埋去，因為有咩衝突都係我哋唔着數。」
港鐵發獎金難補職員創傷
Winnie慨歎港鐵職員成為事件「磨心」，直言同事日日返工「都唔係幾想笑」，士氣亦較為低落。雖然公司本月底向前線員工發放每月2,000元「特別嘉許獎」激勵員工，但她形容這項獎金只是「苦中一點甜」：「好多同事話寧願唔要呢啲獎金，令到香港平息晒一切就最好。」
儘管前景仍未明朗，但她仍樂觀地認為事件總有一天會完結，只希望滋事者可退一步反省，為市民大眾設想：「如果有列車事故，我哋當然抱歉啦，但如果因為呢啲事件令到列車有事，我哋就覺得好冤枉，亦對唔住普羅大眾，希望生事既朋友諗深一層，香港而家個狀態已經非常唔好，希望佢哋明白。」
設施被破壞維修員心痛
港鐵員工對外要應付示威者衝擊，對內亦要照顧被示威者破壞得體無完膚的設施。在銅鑼灣站負責車站維修的香港鐵路員工總會理事長魯志薪，眼見朝夕相對的設施被打爛感到心痛：「我哋梗係好唔開心啦，我哋不停維修，你就不停破壞，個設備無罪㗎嘛，佢哋唔應該將呢啲嘢發洩喺設備上囉！」
30年來一直負責車站維修的他，指自己「對機器多過對乘客」，較少直接遇到示威者正面攻擊，只試過在站內檢查被破壞設施時，有人專登走到他面前質問他，為何要幫港鐵修復設施，他只沉默地做好自己工作便離開。
銅鑼灣站：關站落閘鐳射筆照面
由於銅鑼灣站位處核心戰區，過去數月經常爆發示威衝突而要封站，魯志薪在9月15日便「站在最前線」。
當日大批示威者未有理會警方反對在港島區發起遊行，至傍晚多區出現示威者縱火、堵路，又破壞及堵塞多個港鐵站，港鐵宣布多個港鐵站封站，其中銅鑼灣站E出口原本已落閘，但被示威者強行拉起鐵閘，職員未能再次成功落閘，當時站長要求他與另一同事到場協助，期間不斷被示威者用鐳射筆照射：「當時有30至40個警察喺出口位做人盾，我哋走上前幫手落閘，最後都成功，事後睇片先知被人用鐳射筆照住塊面。」
後備零件用盡或再無設施可用
魯志薪多次以「你破壞，我維修」來形容近期的工作，加班亦有增加。他解釋由於人手及後備零件只按正常保養計算，在示威者連月來破壞下，後備零件已越來越少，維修亦越見困難：「如果咁嘅破壞性行為持續，卒之係會有一日無晒零件，乘客無得用設備。」而將軍澳線部分車站已出現這種情況，擔心破壞持續，影響會越趨嚴重。
他指，港鐵純粹為市民服務，現時卻成為「出氣袋」：「我哋係想做好我哋嘅運輸工作，唔想牽涉其他嘢落去。」他希望事件能盡快平息，重過正常生活，讓香港繼續向前行：「其實經過好多代鐵路人先有而家嘅鐵路，你破壞佢嘅話係會倒退，香港倒退緊，我哋應該向前望唔應該倒退。」
破壞港鐵行為損人不利己
香港鐵路工會聯合會主席林偉強亦批評，示威者連月來的破壞行為，是損人不利己，為破壞而破壞：「點解有訴求嘅人要落喺我哋身上去負責找數呢？呢個對我哋鐵路從業員係好唔公平！」
他指，現時港鐵員工成為事件「磨心」，壓力亦越來越大，但同事問心無愧，維修同事仍會盡力修復：「可能要3部機嵌埋一部，或者5部機嵌埋一部，但盡量嵌得一部得一部，work得一部得一部，我哋最大嘅挑戰係暴徒，如果佢哋繼續破壞，真係有朝一日我哋嘅設備未必可以追上佢破壞個速度。」
透過破壞爭取訴求「唔馨香」
他指，由示威者發起不合作運動開始，公司每星期都會收集工會意見，加強與員工溝通，在運作上作出配合，以及提高前線員工的保障，包括增購頭盔、口罩及眼罩等裝備。
他促請示威者盡快收手，應用適當途徑爭取訴求：「如果透過呢啲破壞可以成功爭取到佢哋嘅嘢，其實都唔馨香，將你自己嘅成果建諸人哋痛苦身上，呢啲係民主咩？呢啲係法治精神咩？」他希望目前情況可盡快完結，不論黑衣人或白衣人亦可和平共處，回復以前的生活狀況。
