葉劉的英文名字叫Regina，有正直，誠信，不善變的意思。亦有另一層寓意，就是王后、女王，與她的形象又確有幾分相似。在中世紀英國，這個名字也被用於紀念聖母瑪利亞。
不知是否受名字影響，葉劉在政治上確實有幾分「潔癖」。新民黨創辦8年，她竟然從不向外籌款，到今時今日為止，她已為黨自掏腰包高達2,000萬元，目的是要「維持黨嘅純潔性」。
「新民黨絕對乾淨，是金漆招牌。」
「個黨越乾淨越好，所以我可以拍枱鬧人。我返來（2006年由美國留學返港）先創辦匯賢智庫，後來創辦新民黨，支出千幾萬甚至2,000萬都有。用咁多錢搞政治，連個女都唔知。我好怕問人攞錢，亦從來無問人攞資助，亦都無去攞（爭取擔任）人大政協，亦都無去做非執董。我不反對有人做非執董，但是作為直選議員，我覺得越乾淨越好。」葉劉淑儀豪言，新民黨絕對乾淨，是金漆招牌，所以可以做到「所有政策考慮都是公眾利益」、「我哋係好乾淨嘅人，同商界無利益瓜葛」。尤其是功能組別議員，她認為最多利益考慮，要小心小心再小心。
「其實功能組別議員已經嘈緊要取消印花稅，放寬按揭，現在是不是有必要？樓價回了一成而已，好多人都望緊樓價跌，我哋不會咁做。」
「退黨還好，我管得冇咁辛苦。」
2011年1月9日，新民黨正式成立，口號是「親近民心，革故求新」，當時主席是葉劉淑儀，史泰祖及田北辰為副主席，余衍深為行政總裁。2014年2月12日，新民黨宣布與公民力量結成聯盟，擴大組織架構。
2017年4月10日，田北辰議員宣布退出新民黨，與屯門區議員蘇嘉雯、朱耀華；葵青區議員徐曉傑、吳家超；元朗區議員陳思靜及荃灣區議員鄭捷彬一同退黨。
「無問題，每個黨都會有，如果理念不同合不來，退了還好。我哋主要退的議員就是田北辰先生，退黨的時候，帶了5至6個（區議員）走，然後最近我哋公民力量有兩位退（黨），其實兩位有離心好耐。退了還好，我管理得無咁辛苦，還可以聚焦管理勝選機會高的選區。
「如果你話不想我哋人丁單薄，咁就收購合併囉！」葉劉淑儀說。她以香港經濟民生聯盟為例：「例如你話經民聯，又招攬咗（立法會議員）吳永嘉，七件（有七名議員）囉，第二大黨囉，好巴閉啊。純粹數目上好，但是理念是否一致我唔知道。我自己寧願熬久一點，希望培養一些和自己理念一致的合作人。例如黎棟國先生（新民黨常務副主席），同我就理念一致。」
葉劉說，能夠和她合得來的，很多都是政府出身的老政務官：「你試過同田北辰合作就知啦，他是商界，佢諗嘢同我不同⋯⋯最合得來完全不會有甚麼矛盾嘅，都係政府出身，政府出身這些老政務官。我啦，黎棟國啦，仲有譚榮邦（前郵政署署長）」。
「陳凱欣，都唔知點樣安置佢！」
陳凱欣宣布出選九西補選，葉劉淑儀第一時間高調支持，外界一直有傳葉劉淑儀想吸納陳凱欣入黨，但葉劉否認。
「無咁嘅打算，我都唔知點樣安置，如果佢入來我唔知放佢邊區選。新西我無樁腳，九西無樁腳，九東都無樁腳。新東有容海欣，陳凱欣擺邊度呀？我真係搞唔掂！（若是）港島我啲區議員又無同佢合作過，就算我話栽培佢，不支持陳家珮，其餘啲人都未必願意。」
陳家珮是新民黨南區區議員，2016年立法會選舉，陳家珮在葉劉淑儀名單排第二，名單取得60,760票，只取得一席，未能讓陳家珮晉身立法會。去年她參加立法會港島區補選，最終敗於泛民參選人區諾軒。陳家珮剛誕下第二名兒子，葉劉淑儀說「佢已經復工」，繼續為市民服務。
「你睇我似有第二春嗎？」
做議員，搞政黨，可能並不是葉劉從政的終點站。她曾參與兩次行政長官選舉，但都因為沒有得到足夠提名，未能「入閘」參選。問會否再選特首？葉劉斬釘截鐵說：「邊有資格呀，我兩次選，提名一次少過一次，我都『紅都面晒』啦，邊有咁大諗頭，唔敢諗啦。」
葉劉淑儀分別在2012年及2017年爭取提名參選特首，但最終未能取得選委150票的提名票。2017那年，葉劉淑儀公開宣布停止選舉工程，承認選委提名「遠遠落後」入閘門檻，但未透露所得提名數字。當被問到是否不足40票，她只說：「你自己都計到啦。」
「我參選咗兩次，第二次（提名）票仲少過第一次，很明顯無祝福係無得選囉。」那為何得不到祝福？她說：「人哋好過我囉，好明顯，人哋比我優秀囉，或者人哋比我年輕囉，一定係咁考慮啦，『選民』係咁考慮啦。」
不選特首，葉劉說會在現有的崗位「盡做」。至於人生還有甚麼所求，她說：「一個女婿囉。」葉劉作為單親媽媽多年，與女兒葉榮欣相依為命，自然希望女兒有個好歸宿。至於她自己會不會有「第二春」？葉太說：「你睇我似有第二春嗎？」
