金燕玲前年發現患上子宮癌，經手術後接受化療，在好友蘇施黃陪伴下積極面對，最後抗癌成功。昨日她在自己新開設的頻道「金燕玲 隨心。隨興」，第一條上載的片就是自爆患上乳癌，片中的她表現輕鬆，雖然談到發現硬塊、經醫生証實患上癌時也忍不住哽咽，但金燕玲表示自己是不幸中之大幸，希望拍片同大家分享。
她說：「我即刻搵醫生檢查，直至年初五確診係乳癌，點解我要公開去講呢？人人都分享飲食扮靚，一來我希望呢件事由我自己口中講出嚟，二來係我之前患癌呼籲大家做身體檢查同埋買保險，但今次我唔係因為身體檢查揭發，係我自己摸到，對我嚟講可能係上帝保佑我，竟然畀我自己發現到。呢粒嘢（腫瘤）好細，我好幸運，因為已經開刀做完手術。」
金燕玲表示乳癌屬一期B，已做手術切除了腫瘤，亦未有擴散跡象，稍後要接受電療，手術翌日已出院。她表示拍片同大家分享，是希望提醒大家要做身體檢查，「我呼籲大家，當你得閒冇事就去摸吓，平時我都唔會摸，因為根本唔知腫瘤係點，但我今次經驗話畀大家知，原來我個胸突然好脹，粒嘢會覺得『哽』住好明顯，所以一定要摸，知道自己有問題，就即刻去見醫生。」
她又表示：「可能有啲人會覺得，哎吔，金燕玲有冇搞錯呀，又生cancer，係呀，我乜嘢都要打孖嚟，流感嘅時候有兩個流感；兩年後又有第二個cancer，但係我覺得自己係一個好幸福同好幸運嘅人，兩個cancer都係不幸中嘅大幸。」
好友蘇施黃隨後在社交網站上載了二人的合照，相信是金燕玲接受手術後所影，並留言：「昨晚金小姐的新YouTube Channel 『金燕玲 隨心。隨興 』一出，有很多朋友及粉絲的慰問。金小姐叫我代感謝大家，佢真係好犀利的，做完手術第二日已出院，第三天已出街，佢話唔好當自己有病匿埋喺屋企喎！我做司機蘇，駕車也小心翼翼，費事揼親佢，衷心多謝大家關心！」
