
人氣爆燈的男團MIRROR最近在九展開成軍後第二次的演唱會,6場門票瞬間售罄,更有傳幾百蚊的門票被炒至過萬元仍有粉絲接貨,不少鏡粉都在網絡高呼偶像MIRROR要向紅館進發。近日有消息指今年聖誕跨年黃金檔期原本預留了給楊千嬅,因其原定於去年舉行的25周年紀念騷,受疫情而無奈取消,紅館向她作「優先處理」答應其主辦單位可順延一年開騷,不過千嬅卻放棄黃金檔期,有傳MIRROR經理人花姐乘勢入紙申請,讓MIRROR可以進軍紅館,如果此事成真,MIRROR就可創下香港樂壇於半年多梅開二度開騷的神話。

據悉,千嬅放棄優先權是因為近年因為立場問題而遭網民無理圍插,而同時她亦開始把工作重心轉移至內地,頻頻接拍內地的綜藝節目,估計有排忙,考慮到演唱會籌備需時,故寧願放棄12月的黃金紅館檔期。至於MIRROR的經理人花姐上月受訪曾露口風表示ViuTV有計劃讓MIRROR進軍紅館,故有傳她正式為MIRROR入紙紅館申請,更最少開10場,不過有傳媒向ViuTV製作部副總裁金廣誠查詢時,他斬釘截鐵表示並冇此事。

傳姜濤拍攝電影
另外,又有消息傳出,MIRROR中的人氣王姜濤有機會進軍大銀幕,演出由彭秀慧導演的戲,並與影后毛舜筠合作飾演母子,前晚彭秀慧特登帶毛姐到九展捧場,之後更在後台跟MIRROR見面,與姜濤合照,毛姐之後更將合照放在個人IG,更大讚MIRROR並留言:「多謝彭導演帶我去威,唔使再問MIRROR有幾勁,因為真係好好好勁,好耐都冇試過睇演唱會睇到咁high,嗌到聲都沙晒。跳到唔記得咗自己幾歲。多謝MIRROR帶畀香港人幾乎已經遺忘了的歡樂。」不過對於開戲一事,有傳媒向彭秀慧查詢,她表示:「所有嘢unknown,真係唔知道,連cast同古仔都未知。」
圖:IG、互聯網

