歌手鄭俊弘與何雁詩拍拖近 3年半，將於星期六結婚，不過二人的婚禮一波三折，本來打算在美國酒莊舉行，但因疫情關係，改為在香港行禮，原本一早訂好了在一間歐陸餐廳舉行婚禮，但到最後限期，餐廳竟然獅子開大口，索取天價，二人惟有臨時另覓場地，幸好在好友和公關幫手，在短時間內找到沙田某酒店的戶外園林草地行禮，終於可以鬆一口氣。
何雁詩昨日到電台宣傳新歌時亦直認有此事，「本身想簡單啲，喺同一間餐廳入面搞掂晒，但唔知係咪因為我哋好遲問，所以價錢好高好高、好唔合理，超出咗預算，所以臨一星期前改咗行禮地方，好彩有公關幫手！大概10日前先知要轉地方，佢即刻當晚幫我哋搵，好彩我同Fred唔算過分緊張，身邊姊妹同公關都好幫我哋，仲緊張過我哋！」
雖然有報道指鄭俊弘即將榮升「6億駙馬」，但何雁詩坦言不知父親有多少身家，而自己婚後仍會出來工作，甚至婚期前一日都有工作在身，至於被記者問到結婚爸爸有冇幫手，何雁詩說：「有啲嘢需要佢幫手，雖然疫情下我哋嘅收入都好低，但大部分都係我哋自己畀。」
