36歲的張致恒（Steven）前年突然宣布與Fans雯雯誕下囝囝「天寶」兼拉埋天窗，隨即被爆一腳踏五船，形象大插水，被冠以世紀賤男，更因此而失去不少工作，為了養家更被指要周圍借錢，欠下周身債。Model馮鎵瀠（Naomi）昨晚在IG的Story開名鬧爆Steven未還錢，因為無限期停業，Naomi表示自己都好窮，公開向Steven追債。
據知Steven欠下周身街數，圈中不少好友當時都同情他的情況，例如關智斌和鄭希怡合共借了$10萬給他，林盛斌（Bob）都有借過幾萬元給Steven，不過並未有追他還錢。
對於被公開追債，Steven在社交網撰長文回應，表示因自己做錯事而令工作完全停頓，迫於無奈下向很多朋友借錢，也試過搵過好多工，做過好多不同行業，「疫情影響底下被炒過好多次，我有努力工作搵錢，希望可以支撐到屋企之餘仲可以還到錢俾朋友，但係而家的路實在太難行，工作完的收入都唔夠屋企開支，想淨少少錢還俾朋友都唔得，令到有好多朋友都好唔開心，我喺度要同所有借過錢俾我的朋友道歉，一直以來我都還唔到錢俾你地真係對唔住，喺嚟緊嘅日子我一定會盡力去工作還錢俾你地！」
他又解釋工人是在兩年前聘請，太太所買的電器是以電話儲下的積分換取，兩個仔的衣服不是名牌，玩具和衣服不少都是婆婆和朋友送的，而因為父母是住屋村，不能養狗，所以在不想棄養三隻狗的情況下，惟有租住村屋，希望大家可以給他一個機會。
