商台DJ梁文禮被踢爆在私人facebook狠批梁詠琪（Gigi）演唱會，但在公開的IG戶口則勁讚Gigi好靚，被網民斥他是「雙面人」﹑「人前人後兩個樣」，引起公關災難。
今天（20日）梁文禮返商台主持《叱咤樂壇》，開咪親自解釋事件，他又表示透過DJ同事Vani（雲妮）寫了段長文向Gigi道歉。
梁文禮在節目一開始便說：「我仲繼續坐喺直播室，首先祝Gigi演唱會成功，亦都有好多樂迷鍾意呢個演唱會，帶畀佢哋好多時間上面嘅Rundown、好多回憶，我同梁詠琪、演唱會團隊以及買飛入場嘅觀眾，講聲唔好意思，亦都對唔住，自己喺私人平台睇完第一晚後，好肉緊，有好多嘢…呢度應該要點樣做、啲歌曲上面呢度斬咗一半、會有少少自己意見，就係自己平台好肉緊咁樣，傳媒就話狠批梁詠琪演唱會咁樣，我都希望呢個回應，大家可以接受。」
他又續指，一個演唱會有不同面向，他希望可以再以另一個角度，如有機會出DVD，他會再想睇一次，因為他接收到好多樂迷信息話：『你睇唔到啲乜嘢呀？』他稱可能座位角度問題，有些會睇唔到，希望可以再次欣賞這個騷。
他又說：「我本人同梁詠琪本人冇機會聯絡到，冇佢電話或聯絡方法，我透過Vani傳咗好大段文字畀梁詠琪，希望佢可以接受我嘅道歉，我有話畀佢知，點解我咁肉緊表達我對呢個騷意見，希望佢可以消化，希望嚟緊Gigi有新歌、有新演唱會嚟到叱咤樂壇呢度。由佢過去4次紅館演唱會，加埋Sam（許冠傑）仲夏夜狂想曲，每張CD、單歌派台，我都有細心聽，某程度上我唔係作為一個Outsider，一個叱咤樂壇主持去狠批一個演唱會，而我都係好鍾意梁詠琪嘅歌，佢嘅歌陪住我好多生活上經歷，好多種種問題，我都好肉緊當中聽到乜嘢，所以先有咁嘅回應。」
不過網民對於他的解釋不大接受，認為他毫無誠意：「愈講愈矛盾」、「佢講乜我都唔再信佢了」、「都幾厚面皮」。反而Gigi大方表示：「唔緊要！電影上畫都會有好或唔好評價，最緊要係我喺當中已盡咗最大努力，每一個意見我都會接受，的而且確我認為自己有很大嘅進步空間，都會不斷力求進步。」
問可認為梁文禮是雙面人？她說：「其實我冇睇，私下都唔太認識佢，所以唔使理會太多，做好自己本分，成個騷我都感受到大家好愛惜我，這樣已好足夠。」
