剛完成兩場《FIGHT FOR》紅館騷的陳柏宇（Jason），日前與一班化身「阿Boo」的小朋友，現身太古城中心的「Merry GIFTmas @Cityplaza」聖誕裝置，並率領眾人充當「一日禮物派送員」，挑戰場內兩大遊戲之餘，又跟換上Christmas look的「毛毛」及「大眼仔」合照。影相期間，一班活潑的「阿Boo」妹豬周圍走，又忽然攬實Jason不願放手，場面搞笑，幸與太太符曉薇育有一3歲女兒陳羿辰（Abigail，Abi）的他冧「囡」功力深厚，全程耐心解答她們的問題外，又不時以誇張表情扮鬼扮馬，成功𠱁得「阿Boo」們勁開心。
提到聖誕將至，雖然稍後要密鑼緊鼓製作新專輯，但身為「廿四孝老竇」的Jason仍不忘抽空陪女兒Abi度佳節，他說：「自從有咗Abi後，聖誕都係同媽媽（太太符曉薇）嘅朋友、小朋友一齊喺屋企開Party，今日見到現場《怪獸公司》嘅布置咁靚又咁好玩，相信囡囡都會好鍾意，所以遲吓我都會再帶佢嚟呢度放電，幫佢影多啲靚相。」經常將工作排得密麻麻的Jason，表示除了為自己事業衝刺，也望給予家人更好的生活。對於剛升讀幼稚園K1的Abi早在N班已成績優異，問對她有否任何寄望？他謂：「最緊要囡囡開心，健康成長。」
