歌手陳柏宇（Jason）與太太符曉薇（Leanne）第二胎出世了！今日（10日）Leanne在社交平台宣布喜訊，細女Audrey平安出世，並貼出一家四口溫馨照，Leanne更大爆Jason即場爆喊，又笑指唔明老公喊的原因，而Jason就話BB出世好熱血。
Jason與Leanne於2017年結婚，婚後育有囡囡Abigail，3年前Leanne曾因宮外孕大出血，更切除左邊輸卵管，至2021年再度懷孕，但不幸地驗出胎兒患上愛德華氏症而需終止懷孕，所以再度懷有細女時，Leanne直言是天賜的禮物，原定預產期是本月21日，但今日宣布細女Audrey等唔切，提早出世，她留言：「Welcome Audrey，都係等唔到21號。」
她又大爆老公Jason爆喊：「其實我老公喊，已經唔係新聞，大家都好清楚，佢係水做嘅男人，不過只係有時唔明喊嘅點係咩？我問佢試當真點解要喊？佢話好熱血，點解佢可以咁可愛？成40歲人。」她又上載Jason抱住細女時的模樣，十足慈父，表情冧到爆。
