44歲歌手小肥（徐智勇）入行13年緋聞極少，早年有網民發現其社交網關注多位健碩男，被質疑性取向，但小肥曾激動否認：「我唔係基，但唔歧視同性戀。」惟近日接受陳志雲YouTube頻道訪問時，終於承認同志身份，宣布出櫃。今日更在IG發文：「嚇親大家，唔好意思。仲好緊張，但我自豪。」雖則驚魂未定，但起碼是誠實面對自己。
從流出的訪問片段睇到，志雲大師單刀直入問小肥：「有件事你跟我好似，記者成日問我係咪鍾意男人？有好多人咁問過你，你通常點樣耍開佢哋？」小肥表示：「未準備好，其實一路都驚，心裏面有啲負擔…我其實到28歲先確定某啲嘢，28年，我都一直否定緊自己某啲嘢，習慣咗，同埋一個恐懼，自己都驚咗，如果承認咗某啲嘢會點呢？」
小肥又提到在2017年製作專輯《睡前服》時，監製康家俊曾指專輯主題係「坦白」，他表示自己好似有所頓悟，並說：「佢哋都有問我，如果他朝一日，記者再問你會點呢？我想坦白，但係好難衝破，唔知點解。」
不過當志雲大師再問小肥是否承認自己的性取向時，他自然點頭說：「係呀！」更話自己面對陳志雲好像食了誠實豆沙包：「回想起2017年，如果真係有人問到我，我點呢？我其實都係耍走佢，唔知點解你一問我，我覺得好似係時候要行呢一步。」小肥「坦白」後顯得有點慌張，更忍不住淚流滿面。
圖：IG
