反修例風暴擾攘半年仍未止息，由於對特區政府以至警隊的批評一針見血，冼國林意外地成了網上紅人。出生草根的冼國林，擺過地攤、做過苦力、揸過的士；97年金融風暴，他投資失利，差點破產；前年，惡菌感染奪去了他一隻眼，也幾乎奪走他的生命，但他沒有氣餒，快速接受現實，「衰咗就衰咗」，奮勇由低谷爬起來，現在更將迎來人生另一個事業高峰。
2008年一套《葉問》電影，掀起了一陣詠春熱潮，也讓冼國林的名字瞬間冒起。隨着這套電影的成功，同時造就了冼國林在影視界大展拳腳的機遇。
這些年來，他默默地在佛山西樵興建了一座全實景建築的影視城，更得到荷里活青睞。他誓言，未來要將這個地方打造成全球最美的影視城。
冼國林用自己如電影情節般的奇幻人生來證明，輸在起跑線，不等於輸一世；靠努力、靠堅毅，總會成功。
文：潘翠華 圖：黃冠華
冼國林有多重身份：既是武術家，也是金融界及影視界名人，最近更有一個新身份：KOL（網紅）。驅使他從幕後走到幕前，向社會發出正義之聲的，是他年前的一次無妄之災，死過翻生後的覺悟。
人們都說，入過鬼門關的人，經歷過生死，所以都會特別堅強。
濟州島飲宴後感染惡菌
2018年，冼國林遠赴韓國濟州出席「殼后」朱太、朱李月華的生日會時，左眼不幸感染惡菌，最終需要返港割眼保命。說起這場意外，冼國林猶有餘悸：「我打開功夫，身體一向健康，但突然感染細菌，差啲死。當時有五個專科醫生會診，包括心臟、脊椎神經、細菌、腸胃和眼科，因為我全部都感染晒。」
當時冼國林的發炎指數超過240，遠超一般人平均不超過15：「醫生要我決定割唔割眼，普通人真係好難抉擇。我太太當時都六神無主，拿唔定主意，但我就好果斷咁講，割吧，反正唔割必死無疑。」
連續3個月靠抗生素救命
割眼後雖保住性命，但康復之路漫長得像征服萬里長城：「當時其實幾辛苦，痛到全身都郁唔到，由起唔到床到可以起床，由坐輪椅到開始起身行，逐步逐步康復。最痛苦係要插一條喉，由手臂穿到心臟，每日打兩個鐘抗生素，打咗3個月，到最後條喉都捱唔住要拔出來，再口服抗生素一個月。」
這場跟病魔的戰鬥，最終由冼國林勝出：「醫生都覺得係奇蹟，通常咁強嘅抗生素，肝同腎功能都會受損，但慶幸我沒有。我不煙不酒，喺病嘅過程中都堅持做運動，佢哋都覺得好驚喜。」
執返條命接受現實
除了勤於運動外，冼國林認為心態尤其重要：「當時我同自己講，我唔死得嘅，因為女細老婆嫩，咁樣死咗對佢哋好唔負責任，所以我堅持過去。好多人都好悲觀，但我心態調節得好快，無咗就無咗、輸咗就輸咗，要向前看，要接受現實。」
獲得重生後，冼國林自覺多了一份使命：
「如果上天攞咗我一隻眼，但唔攞我條命，即是應該有啲事我要繼續去做，於是我就向社會發聲。」
建粉絲專頁針砭時弊
在反修例風暴下人人自危，擔心「槍打出頭鳥」，誰批評不同政見的人，誰就被「起底」、「私了」，偏偏冼國林毫無懼色。10月時他在社交平台成立了專頁《冼師傅講場》，專門拍攝短片評論時政局勢，批評政府，甚至批評建制派，又向警隊提議平亂對策。一針見血、大膽敢言的作風，令他短時間內吸納了近2萬粉絲。
成為了「網紅」後，冼國林人氣急升，他的建議不少更獲得政府採用，包括徵用紀律部隊協助警隊執行職務、警隊對示威者由驅散改為圍捕等等。他謙遜地說：「我是個老人，還是個傷殘老人，但傷殘老人也可以有積極人生。」
這位「新進網紅」笑說，現時他擁有一班忠實擁躉，跟拍了一套大受歡迎的《葉問》一樣，成功感滿滿：「好多人以為我出呢啲片，後面有團隊幫我，但其實我係one man show（獨腳戲）。」他解釋每次拍片流程：早上回公司做半小時資料搜集，跟着錄影15分鐘，再交給同事做簡單剪接，下午便可出街。
提供觀點不強迫接受
由於冼國林曾攻讀法律，他不時在短片中分享一些法律知識，因此被人誤會他是「冼律師」。他說：「我對法律係有啲研究，點解我經常發聲？就是我發覺好多年輕人被一些別有用心嘅律師、被一些似是而非嘅法律誤導。」
作為詠春師傅，冼國林也盡量去「點醒」徒弟：「我都有啲徒弟係黃嘅，原來佢一直只睇一邊嘅報道，咁咪封咗自己條路。」不過，他不會強迫徒弟接納自己的觀點：
「如果對方有立場嘅話，你千萬唔好以為可以用三言兩語說服到佢。佢變唔變，係佢自己嘅修為，我嘅責任只係提醒，好似阿爸打仔咁，你越迫佢，佢只會越反感。」
教師應教學生尊師重道
作為習武之人，冼國林拳不離手，現今每周兩次在海關及私人拳館教授詠春拳。他很強調徒弟要尊師重道：「若果你唔尊重自己師傅或長輩，你都唔好期望你嘅後輩會尊重你。我而家好痛心一啲教師，教到學生唔懂得尊師重道，教到佢哋做錯事以為唔使承擔後果。咁做係好無道德，終有一日佢哋嘅子女都會受到教訓。」
一家人政見相同是福分
冼國林自言生活簡樸，吃白粥油條也可當一餐，最享受是與太太和女兒在家煮飯。他說，為社會發聲，最難得是得到妻女支持，更讓他感動的是，8歲的女兒非常懂事：「佢問我，爸爸你怕唔怕？我話，爸爸唔怕，你怕唔怕？佢話，咁我都唔怕。」他笑說：「有朋友話，一家人政見一致，係一種福分，我覺得係嘅。」
冼國林希望以自己作為榜樣，證明不需用暴力，以和平方式也可以改變社會：「用建設性嘅聲音，好過用破壞性嘅行為。」
