貴為上市公司主席，冼國林身上絲毫沒有半點富豪的味道。穿得樸素、吃得簡單，他坦言自己出身非常草根，若不是靠後天發奮，可能一生就活在庸碌之中。他特別告誡年輕人：「你們今日所謂的生於亂世，如何差，都一定差不過我。不努力、怨天尤人，你最後也只是會怨天尤人。」
冼國林是個「50後」，經歷過香港最艱苦的年代：「我出身在西營盤一個小販家庭，一家七口住一間房。爸爸60多歲退休後才生下我，我媽媽當時都有40歲，所以我自7歲開始已經幫家人擺地攤。」
冼國林是家中孺仔，最得父母寵愛，他也因此侍寵生嬌：
「我細個好頑皮，中學5年讀咗6間學校，唔係成績差就係操行差。終於中五會考，最叻係中史科得D，中文同經濟各得E，總共4分。」
中五輟學做「苦力」
讀書不成，冼國林中五後輟學投身社會，做過不同工作：「我做過貨倉助理，實際上即係『苦力』，都幾辛苦下。不過辛苦之餘亦有得着，搬完木箱又要學埋數，文武都學到啲。」這樣混混噩噩的日子過了好一陣子，年紀漸長仍一事無成。冼國林開始覺得不對勁，便到夜校重讀中五，終考到1B2C成績，過着日間在銀行打工，晚上揸的士的生活。
冼國林沒想到，改變他一生的時刻，就在那一晚：「嗰晚我如常揸的士，點知畀差人抄牌，我求咗佢好耐都不得要領，你知啦，抄次牌就成晚收入無晒。」正當冼國林心灰意冷的時候，他眼前看到的更震撼：「我見到抄牌嗰個差人行過對面馬路，向一個一粒花，剛喺學堂出來的幫辦同沙展敬禮。」
重遇舊同學 激發上進心
冼國林赫然發現，那個一粒花幫辦，正是他的中學同學：「我當時心裏面非常唔開心，明明學校裏面我聰明才智比佢好，但就係因為佢會考考得好，入咗師範考到幫辦。當時我就諗，如果我再唔發奮，就真係唔得喇。」
當時的不忿無法吞下，冼國林下定決心要考取相等於大學學位的英國特許銀行學會專業試。皇天不負有心人，天資聰敏的他，以極速兩年半內，考畢13張證書。他笑說：
「當時我上司都考咗12年先考晒，佢見到我拎住啲證書，驚呆了。」
年輕人無權破壞社會
不止如此，冼國林於1979年在工餘時間做過一年多輔警，當年更在警校以第一名取得「銀雞頭」（銀笛獎）。在不同領域都取得驕人成就，足證他的好學上進和努力不懈，徹底改變了他的人生。
說到這裏，冼國林特意要告訴年輕人：「今時今日好多後生仔怨天怨地怨社會。講出身，我出身比你哋低，你哋好容易有機會讀大學，我哋以前要讀夜校都唔容易，考專業試都無錢讀，要自修。」他語重心長地說：「社會無欠你哋，香港今日咁成功，係用幾代人嘅努力換來，你哋無為社會貢獻過任何嘢，其實無權去破壞佢。」
