原定下月（11月）24日投票，但目前出現變數、有機會押後的區議會選舉，建制派遭受自2003年以來最大的考驗。一場因《逃犯條例》修訂而引發的政治社會風暴，每一個人都受影響。有建制人士形容，這將會是一場悲壯的選戰，未戰先輸幾成定局，當下只能做好自己，迎難而上，望社會早日和解，讓建制派避過慘敗之劫。另一邊廂，泛民心雄，盼望藉着今次選舉結果撼動行政長官選舉委員會席位。不過暴力滿街，12月投票能否成功進行，至今仍是未知之數。
文﹕李偉明、潘翠華 圖﹕黃冠華
建制策略
社區工作打動選民
挾着「反修例」運動的聲勢，泛民料將大舉進攻區議會。民主黨立法會議員尹兆堅日前在網台節目上爆料，稱泛民各黨派以及欲參選的「年輕人」基本上已協調好，458個議席之中，沒有泛民代表落區「服務」的，目前不會多於20個，協調名單已經「落晒名」（即近440人），只是技術上不能公布參選。泛民空群而出，雖然未必能直接衝擊建制議席，但肯定會分薄建制兵力，讓對手大失預算。
「今次嘅區選，會係相當嘅悲壯……」一名九龍區的建制派議員向記者表示，今年區議會選舉，《逃犯條例》修訂令愛國愛港陣營陷入一片水深火熱之中：「泛民支持者畀佢推晒出嚟，中間立場選民就算唔支持佢哋，也不會支持我哋建制派。其實搞成咁真係好唏噓。」該名議員表示，自己多年來為社區做很多事：「實牙實齒咁做，最後畀人用一兩句口號浸死，好唔抵。」
多年地區工作被口號浸死
該名議員說，一到選舉時，只要遇上重大政治事件，建制派選情總是悲觀：「想連任，難，想挑戰，輸梗。」他說，很多年輕一輩的新晉議員，未經歷過03年沙士加廿三條立法的洗禮，不知到時選戰有多難打，到今天還自信過去在社區所落的功夫，會幫到自己：「我最記得當年民主黨黎自立，03年喺中西區轉去油尖旺選，一個教車師傅一點地區工作也沒有，但係都選到，因為乜嘢？因為7.1嘅50萬人遊行，因為政府推23條囉！」
他又舉出另外兩例，稱在上屆區議會選舉，泛民兩名大老何俊仁和馮檢基，都是因為被「自己友」鎅票而敗陣：「好似近排好紅嗰位（立法會議員）何君堯律師，當年唔係有鄭松泰﹙熱血公民﹚佢輸咗畀何俊仁啦。深水埗呀基都係因為畀前黨友黃仲祺鎅咗佢啲票，先畀民建聯偷雞咋，今年睇怕冇呢枝歌仔唱，泛民有機會收復失地。」
政治素人再搶灘 挑戰建制大佬
他又預言，「傘兵」四年前在區選中成功「打大佬」的情景將會繼續複製：「上屆九龍城區議會主席咪咁輸囉。」翻查記錄，這說的是「青年新政」鄺葆賢，2015年參選黃埔西，取得2,114票，以39票之差險勝時任九龍城區議會主席的劉偉榮。除了劉偉榮，更為人所認識的例子，是立法會區議會雙料議員鍾樹根，以163票輸給政治素人徐子見一役。
他估計，今年建制陣營在區選會「血流成河」﹕「至少無一半議席，幾個區隨時畀泛民過半控制埋。140席都畀多佢（現屆區議員中，連無政黨建制派，有約300人）。睇住嚟，唔少資深議員，到時一覺醒來至發覺自己唔再係議員。」今屆選舉，全港18個區議會共431個民選議席，連同27個當然議員，合共458個議席。
這位不願披露姓名的區議員說，他的議席本來相對安全，過去無人挑戰會自動當選，但現在估計也會有人以泛民旗號空降。他又說，出事的應該不只他一人﹕「早排有人提議搞『反自動當選運動』，搵人挑戰我哋。先唔好話得唔得，至少咁做會拉散建制嘅兵力，一定會影響到選舉。」
商戶資金流向泛民
「挑機」籌碼增
「泛民以前最大嘅問題係資金唔夠，挑戰現任議員有一定難度，但今年嘅情勢的確係好唔同。」他指出，最近有中小企業，紛紛「落注」泛民，向個別議員提供財政資助：「例如有建築商主動幫泛民潛在議員參選人，第日泛民真係當選，啲大廈維修工程，唔好話涉貪，有個議員幫吓口都好。」他解釋過去這類公司只會和建制打交道：「今年連佢哋都雙邊投注，證明好多人都預咗建制會輸得好慘。」
面對如此情況，該名議員表明，完全沒有任何對策，因為一個小小區議員，在《逃犯條例》修訂的政治風暴中都無可作為，一切只能看事態發展，可以說是非常被動：「我哋做地區工作，老實講我真係睇唔到有乜嘢可以掹得返件事，只可以盡做，睇吓啲街坊會仲唔會全力支持我囉。」
社區幹事：
「支部大佬都唔出聲！」
除了資深議員，建制派新一代的「社區幹事」，原本磨拳擦掌準備向泛民議員「挑機」，可是一個《逃犯條例》，對手拿着「反送中」旗幟上街，聲勢大振，一時間手足無措。
「最大件事係啲高我哋幾級嘅支部大佬，出事之後完全無表示，又唔表態，我就當堂企咗喺度。」一名正準備在新界東出擊的社區幹事向記者大吐苦水，他本來計劃狙擊一名早前脫離民主黨的議員，搶奪他的地盤。
「我真係連扶阿婆過馬路都試過，而家真係唔知點選。」該名社區幹事表示，事件不斷發酵，傳媒又一味只報政府負面消息，他自己都不知如何向巿民解釋：「本來有希望，而家好冇希望囉。」
機會很微但盡力一戰
他說，事件最可恨的，是一眾地區支部的大佬和立法會議員，在抗爭爆發之後全面「玩失蹤」，沒有向支持者說明：「你大嘅唔郁，我哋點敢郁？有兄弟開街站畀班後生仔圍，我哋完全冇還擊之力。」該名社區幹事表明，今次勝選機會微，但都會盡力一搏：「我呢兩年都真係喺個區做咗好多嘢，我相信街坊。」
事實上，經過一系列「反送中」抗爭和宣傳後，由5月31日至7月2日的新增選民登記，接近38萬6千人，情況和2003年50萬人上街後的立法會選舉、以及2014年佔中後一年的區議會選舉時相若。
新增年輕選民多有利泛民
今年新增加的選民中，有一半年齡介乎18至38歲，反映年輕人希望以投票改變社會現況，向政府表態。另一方面，有32,000名選民因為選民離世（多為長者），49,000名選民經查訊程序等原因而被載入取消登記名單，淨增加約30萬5千人。此消彼長的情勢下，建制派形勢更為惡劣。
03年50萬人參與7.1遊行，反對基本法廿23條立法，翌年立法會換屆選舉，新登記選民為30萬3千人，是當時新高。2015年，佔中結束後一年，該年年底為區議會選舉，當時有新登記選民26萬3千人。
資深議員提早「歸位」落區
建制陣營區會選情嚴峻，有政府領袖私底下向黨友表示，非常擔心黨的選情，甚至對建制派即將大敗感到沮喪，要其他黨友議員安慰返轉頭。更有傳建制中人曾當面向林鄭月娥發難，可見建制面對當今情勢非常憂心。
有建制派立法會議員私底下向記者說，對今次選情不是悲觀，而是十分不樂觀：「年輕選民一定會出嚟投票。你諗吓，連續上街咁多個禮拜，都應該辛苦，但佢哋都咁做，咁投票日出來投一張票，有幾難呢。」他透露，有黨內比較資深的區議員，甚至是區會立法會雙料議員，須提早「歸位」落區爭取支持：「希望可以儘量鞏固。」
工聯會立法會議員麥美娟接受《堅料網》訪問時指，反修例風波引發社會分化和撕裂，市民對政府的工作已非常不滿意，怨氣十分重，而建制派一直被視為親政府，故不少市民將怨氣投射到建制派身上。她直言，對建制派在區議會的選情不太樂觀，部分上屆險勝的議席更是「危危乎」，最壞打算是整體損失約三成選票，但結果還須看未來事態發展。
麥美娟﹕非黑非白，企喺中間最痛苦！
「睇返過往選舉之中，唔同陣營嘅支持者大概都係固定咁上下，剩低中間約有三成選民容易受社會事件影響，在選舉之前先至決定投票嘅方向。」麥美娟預料，今次建制派很可能會損失這些游離選票。加上今年新增選民登記自03年沙士後創新高，當中不少都是年輕選民，他們的取向將直接影響選情；特別是在上屆區選中僅以數十票之差險勝的建制派議席，在這樣大的風波中，所面對的危機肯定會更大。
在社會撕裂下，麥美娟認為，大部分市民已經take side（歸邊），站在中間的人越來越少：「最近聽一個朋友講，而家社會最弊嘅，係黑色嘅只收到黑色嘅資訊、黑色嘅畫面；白色嘅就只收到白色嘅資訊、白色嘅畫面。乜嘢人係最慘呢？就係企喺中間，睇晒黑白兩種色嘅畫面，就係最痛苦。但係仲有幾多人可以企喺中間，睇得晒兩邊畫面？」
社會應冷靜一下 不要再分化
麥坦言，單靠建制派單方面並不能改變選舉格局，她期望是整個社會一起作出改變：「而家每個星期都有唔同遊行示威行動同暴力衝擊事件，我諗呢個時候最緊要係大家都要停下來，冷靜啲，唔好再互相批評、指責，令社會繼續分化。」
不少人都認為，建制派將會在區選中大敗而回，泛民將會大舉進攻，而且素人單挑自動當選建制議員的行動，雖然未必能直接衝擊建制議席，但肯定會分薄建制人手，希望可以在其他選區中搶灘。
