勞工及福利局局長羅致光今年4月初在立法會上，向哭訴搵工難的67歲長者黃月嫻（黃姐）說了一句：「可以搵勞工處協助就業。」但兩星期後，審計報告卻踢爆勞工處協助40歲或以上的「中高齡就業計劃」報大數，成效根本不彰。
黃姐就是聽從羅致光「建議」到勞工處找工作，兩個月以來獲勞工處配對10多份清潔工，結果卻處處碰璧，至今仍每日依舊執紙皮過活。
文：陳 明 圖：胡耀威、黃冠華
以執紙皮維生的黃姐，自從在立法會向局長哭訴過去兩年找過10多份工都無人請後「爆紅」，她事後有按局長「建議」到勞工處找工作，但至今兩個月，獲配對10多清潔工，包括醫院清潔雜工、地盤清潔員、食肆清潔及兼職寫字樓清潔等，卻全無下文。
黃姐表示，勞工處轉介的其中一份醫院宿舍清潔雜工，她在社工陪同下到醫院面試，卻獲職員告知該職位已請了人，其後又稱Ｘ光部剛好有空缺，要求黃姐填申請表後再等通知：「都無下文，你請咗人都打返畀我吖，佢直情無打畀我。」另一份食肆清潔亦一樣：「我一打去佢就話請咗人喇，啱啱勞工處先話請人，佢又話請咗。」
黃姐認為，整個勞工市場早已將長者標籤，勞工處亦無逐一審視長者的工作能力作合適配對：「我覺得佢哋標籤咗我哋，你哋上咗年紀，就一定係做清潔，所以我咪覺得好唔公平囉，雖然職業無分貴賤，你都睇下啲工種啱唔啱我哋，同埋了解下我哋之前做啲咩工。」
黃姐—— 搵工難唯有踏上拾荒之路
曾在公立醫院任職病房助理員的黃姐，60歲退休後找過無數工作，最後才被迫踏上拾荒之路。獨居的她退休後每月只有3千多元長俸，扣除租金及雜費後已所剩無幾，故一直有找工作自力更生，維持生活。她憶述，曾做過警署雜工替工，幫手接聽來電及送件，亦曾做過診所替工，最長一份是兼職派傳單，做了兩年，每日工作4至5個小時，後來因為公司結業而失業。
自此之後，黃姐一直都找不到工作：「應徵過唔請我無10份都有8份，有時甚至見都無得見，有啲喺電話一問你幾多歲就即刻叫你等電話；有啲問得詳細啲，最後問你幾多歲，又係叫你等電話⋯⋯就係搵唔到嘢做，先至執紙皮。」
轉瞬間執了4年紙皮，黃姐指近月紙皮價格下跌，令生活變得困頓。以她平均每日執60至70斤紙皮計算，每日收入不足30元，只僅僅夠食一餐：「我執咗咁耐真係兩餐都幫唔到，只係一餐，因為而家啲嘢太貴，好多時我兩餐夾埋一餐食。」近年因腰患及腳痛，黃姐要用拐仗輔助行走，即使現時有全職工作願意聘用她，她亦要考慮自己體力：「我而家搵都係Part Time或者半日工，因為太長時間我都驚我而家個體力真係唔得。」
香港是全球最長壽地區，女性平均壽命高達87歲，換句話說，黃姐還有20年要過，她亦坦言不知將來怎算：「希望自己身體健康，咁我可以繼續執，我唔想靠政府，會執到自己執唔到為止，到時先至攞綜援啦。」
強叔—— 積極求職卻頻被Cut線
黃姐的求職經歷並非一例，現年63歲的強叔，一直從事地盤工作，但在約50歲時患上痛風，不時病發令他難以工作：「好似癌症咁痛，行都行唔到，隻手直情郁一郁就痛，寧願斬咗隻手落嚟，痛到好交關。」受痛風煎熬的他被逼停工，倚靠積蓄過活。
直至3年前，強叔眼見健康好轉，痛風亦減少復發，積蓄已所剩無幾，便打算重投勞工市場，找地盤雜工工作：「我唔想攞綜援，都想做嘢，幾年前已經去勞工處搵過工，搵番自己本行，我一打電話去，佢就問我幾多歲，我當時話啱啱60歲啦，基本上無機會講第二句佢已經Cut線。」
強叔找過多份工作都碰釘，捱至今日已山窮水盡，幾經掙扎後，最終向現實生活低頭，在4月底申領失業綜援：「我無做嘢10幾年，到今時今日63歲先攞綜援，已經對得香港政府住有凸，真係無路再行，其實好灰心。」居住在單身人士宿舍的他，單是租金每月便要1,800多元，他無奈地說：「唔攞綜援我食咩？我要食、要交租，你諗下我60歲都搵唔到（工），何況而家63歲？」
記者訪問強叔當日，即場幫強叔搵工，在勞工處網上「年長求職人士專頁」共找了7份地盤雜工工作，全部列明「歡迎中高齡求職人士應徵」，日薪600元至800元不等，有地盤工作經驗優先，另要持有平安咭及工人註冊證。
強叔按照招聘空缺上的聯絡資料，逐一致電查詢。強叔先致電一間工程公司：「請問呢度係咪請人？」對方：「係呀。」強叔：「我63歲，得唔得呢？」對方：「哦，63歲唔係好適合喇，因為我哋要落沙井，要落密閉空間。」
強叔又按資料再致電另一間鋁窗公司，強叔：「請問你呢度係咪請人做嘢呀？」對方：「我哋請緊維修工。」強叔：「啱呀，我有10幾年防水經驗。」對方：「平安咭、註冊證係咪有齊？」強叔：「有。」對方：「先生你幾多歲？」強叔：「60零歲。」對方：「哦，咁唔係好啱喇，唔好意思。」另有部分則叫強叔留電話等通知，強叔大嘆：「佢哋都係有年齡歧視！」
強叔認為，建造業工作純靠體力，在年齡上存在限制，又指勞工處設立的「中高齡就業計劃」表面上有很多職位提供，但其實很多僱主是「表面上應酬政府，佢哋係唔會請」。
普及長者就業應有相關配套
協助拾荒者的組織「拾平台」發言人鄧永謙認為，勞工處現行的就業服務雖好，但有時只是「為配對而配對」：「佢哋個程序只係幫佢搵工，而無去幫個長者分析究竟有咩工作適合佢，包括評估佢健康狀況、家庭經濟狀況、居住位置與工作地點等，呢啲長遠配套都冇好充分做到。」
他指，不少僱主會用很多不同表達年齡歧視的方法，拒絕聘用長者：「可能係整體社會氣氛覺得年長嘅人唔應該工作，或者佢有得選擇嘅時候佢會揀個年輕啲，咁點解政府唔提供多啲社會保障畀佢哋呢？」他認為要普及長者就業，政府有責任帶頭去做友善對待，並要檢討現行長者就業政策及社會保障等問題。
政策鼓勵僱主無視長者需要
社區組織協會社區組織幹事吳衛東則指，60至64歲群組的就業人數在過去數年均有上升，反映長者其實願意工作，但部分開始體力衰退或患病長者未必能應付一份8小時的全職工作，尤其是保安、清潔、洗碗等體力勞動較高的工種：「政府講個動作好好聽嘅，話鼓勵長者就業，如果佢就業到8小時就唔使你鼓勵啦。但如果佢體力無咁好，捱到4個鐘，搵到咩工呢？」
他批評，現行「中高齡就業計劃」向聘用60歲或以上長者的僱主，每月發放4,000元在職培訓津貼，為期半年至1年，做法十分荒謬，即使僱主不穩定地聘用長者亦可取得津貼：「鼓勵僱主係無可厚非，但同時無鼓勵過長者。」他認為，政府應向長者提供就業配套，將部分津貼用作協助長者購買醫療保險、勞工保險，甚至要求僱主提供彈性上班時間，創造更多就業機會。
「呢個其實要政府帶頭先做得，我哋睇好多政府外判工作，無論係醫管局或屋邨清潔，都係講緊8個鐘，無遷就長者工作需要，如果政府帶頭外判工作有4小時，可能會鼓勵到啲長者。」
