有「日本旅遊達人」之稱的杜如風（Helen），鮮有在幕前演出，最近首度亮相J2主持旅遊節目《解風東京》，除了貫徹招牌搞笑及無厘頭作風，更加入不少貼地元素。
前晚節目播出第一集後，即傳來喜訊。Helen受訪時透露收到製作組傳來喜訊，指《解風東京》首集收視高開，不但比之前的《冲遊泰國》高，更成為J2去年六月再出世後最高收視節目！Helen今早受訪時開心謂：「聽製作組講頭兩集收視都唔錯，第二集仲接近5添，我唔係好識架，佢哋話係舊年六月以嚟最高，咁我梗係開心，希望大家嚟緊繼續支持。不過最開心第一集播出之後，有好多網民Message話好掛住我，又話啲回憶返晒嚟，真係好多謝大家鍾意呢個節目。」問到如何回饋粉絲，Helen即一貫豪邁作風：「搵啲好嘢出嚟開心share啦，嚟緊我會IG開Live同大家傾吓偈，到時會送吓潮物咁，大家密切留意。」其實Helen確是十分緊張觀眾反應，前日節目首播後即在FB留言問道：「點呀，好唔好睇呀？」，網民紛紛留言讚她好介紹兼搞笑：「海膽宴好正」、「跌海膽好好笑」、「你介紹嘅嘢真係好正」、「半個鐘唔夠喉」、「有『風』格」。
