要在香港推廣棟篤笑文化，阿V認為並不容易，因為港人眼光太狹隘。
「大部分人都係識黃子華、林海峰，你唔可以話睇棟篤笑唔識黃子華，但你唔可以話棟篤笑就等於黃子華。即係Jazz係音樂，但音樂唔係Jazz一樣。」他認為，每位棟篤笑表演者都有自己的故事，表演方式亦可以千變萬化：「有啲人嚟open mic night（麥克風開放夜）會模仿黃子華，我話你唔使模仿佢嘅，我哋唔係cover band（模仿者）。如果我要睇黃子華，我係會去睇黃子華嘅，我唔駛睇你，反而我想睇你講你嘅故事。」
正正由於港人欠缺講故事文化，阿V更想將棟篤笑的正能量傳揚開去，不但身體力行到不同學校和機構授課，2017年起更創立每年一度的「香港爆笑節」，凝聚一班棟篤笑愛好者，舉行長達三星期的馬拉松式爆笑騷，向港人介紹不同種類的喜劇，有長、有短，可以唱歌、可以互動、可以玩遊戲。期間還創辦「新秀棟篤笑大賽」，培育本地棟篤笑新秀。
政策落後 娛樂事業難飛展
作為搞手，阿V坦言找表演場地是最大難題，他認為政府政策太落後：「爭拗最多係娛樂牌（發牌）嘅問題，太多grey area（灰色地帶）。以前做騷要經一啲渠道先做到，但今時今日已經變咗好多，可以上網自己賣飛、訂場地，但好多場地都無娛樂牌。」他又以觀塘工廈表演場地Hidden Agenda事件為例：「點解會冚佢？但又唔冚其他？就係法例太多grey area。」
阿V明白政府做很多事效率比較慢，但娛樂事業在互聯網推動下，發展非常快，他舉例：「YouTuber上網做嘅嘢，收嘅錢，報唔報稅？呢啲嘢好難拗。」他希望政府能盡早檢討娛樂方面的政策。
