提起「棟篤笑」，你必然想起黃子華、林海峰等幾個藝人，但其實「棟篤笑」的世界很廣闊，更是不分種族。眼前這個印度裔大男孩Vivek Mahbubani（阿V），也是一位「棟篤笑」表演者。印度人表演「棟篤笑」没甚麽稀奇吧？奇就奇在阿V 是用流利的廣東話來表演！因這份獨特技能和職業，他獲選為「2018年香港十大傑出青年」，更是首位非華裔得獎者。他希望以這個身份鼓勵身邊人：「當一個印度人喺香港講廣東話棟篤笑都可以成為傑青，你仲有咩藉口？Believe in yourself（相信自己）！我唔信你嘅夢想比我更離譜囉！」
文：潘翠華 圖：黃冠華、受訪者提供
阿Ｖ是家族第三代在港定居，在香港出生、長大，在嚴格意義上，阿Ｖ其實是個不折不扣的本土港男：「朋友成日問我，『阿Ｖ你幾時返印度？』我答佢『無返印度呢個概念喎』，Hong Kong is my home（香港是我家）！」
阿Ｖ的廣東話跟英語一樣流利，他說，要感謝父母的先見之明：「我讀小學嗰個年代，非華裔人士學廣東話並唔普遍，好多都讀國際學校，或者去專為EM（少數族裔）而設嘅學校。我屋企人唔識講中文，喺香港有好多限制，好多地方去唔到、見識唔到，於是佢哋決定要俾個仔學好中文。」
「唔係華人都有香港精神」
如是者，父母幫阿Ｖ報了普通小學，又請來補習老師，一心以為這樣就學到中文，但原來還不足夠：「始終欠缺一個學習環境，返到屋企又無人教。」幸好阿Ｖ媽媽沒輕易放棄，經常用不同方法鼓勵他：「我去公園玩，媽媽問我想唔想同旁邊小朋友玩？想，就要先學好中文，咁我就會諗『係喎係喎，學中文幾好喎！』係學得好辛苦，但如果當時放棄咗，我會好後悔。」
獲得傑青殊榮，對阿Ｖ而言有很好的象徵意義：「我發覺新一代嘅少數族裔對身份認同有好大疑問，我希望可以成為一個好嘅example（例子）。傑青唔係睇你咩種族，唔好俾你嘅膚色、種族限制。香港唔係個種族，而係個心態，唔會話你唔係華人，就唔可以有香港精神。」他又引述母親的說話，「無一個對的種族」。
出道逾10年，阿Ｖ演出過數以百計的「棟篤笑」，在澳洲、日本、新加坡等地，都留下過他帶給觀眾的笑聲，甚至上過郵輪，在海中心開騷。但講到最難忘的一次表演經驗，卻是在香港的一間醫院內。
「聽到人笑我就好滿足」
「當時醫院職員同我介紹，今日嘅觀眾係末期癌症病人同佢哋嘅家人。我覺得好感動，因為佢哋將來點樣都好，都會有呢一個開心嘅回憶。我無諗過一個笑話會有呢個能力。嘩！That’s so meaningful（這非常有意義）！」他至今還保存着一位病人親手造給他的麥克風小飾物，珍而重之。
到不同學校作慈善演出，也令阿Ｖ樂此不疲：「有啲小朋友聽到我講笑，佢直頭哇哈哈哈（趴在地上）要咁樣拍地下，我覺得好有滿足感，好開心。」對他來說，令到一班不相識的人發笑，就是他最大的回報，比賺錢更重要。
在個個看着手機「餸飯」的今天，喜愛閱讀書本的人已不多，會看《孫子兵法》的人更少，阿Ｖ是其中一個：「我覺得佢講嘢好有point（重點），好似有一課係講planning（計劃），其中有一句話『打仗之前，你都要知道自己贏定輸，你先好落去打。』（編者：知己知彼 ，百戰不怠。出自《孫子兵法》謀攻篇）」看來他比某些香港人更熱愛中國文化。
