從事幼教界近50載的香港幼稚園協會會長唐少勳表示，現時香港幼稚園逾1,000間，學額絕對足夠提供予適齡幼童，只是有部分羊群心態的家長，一窩蜂報讀某些名幼，因而促成了這些面試班的誕生。她認為，對一些內向、害羞及不喜歡說話的小朋友，面試班某程度上的確有幫助，但每個小孩的吸收能力有所不同，不能保證所有小孩參加面試班後，都一定能入到目標幼稚園。
唐少勳指，幼童面試成功與否，運氣佔很大因素：「因為面試嘅短短一個鐘入面，小朋友嘅表現係取決於當時所遇到嘅事情，有時喺陌生環境鬧情緒，都無辦法控制。家長一定要記住，小朋友面試時只不過得兩歲，你可以期望佢做到乜嘢呢？唔係話催谷、操練，就會令小朋友突飛猛進。古語都有云，切忌『揠苗助長』。」
注重身教、親子關係
如果要挑選學生，唐少勳最着重的有以下幾點：「首先要睇小朋友嘅自然表現，第二點要考慮小朋友居住地點。」她解釋，這兩點好像跟面試班所教的全無關係，但卻很重要：「舟車勞頓真係會令小朋友無咁醒目，會呆啲。」另外，她也會觀察家長與孩子的親子關係：「無論小朋友同家長係一齊面試定分開面試，從言談間都可以睇到佢哋真實嘅一面。」
唐少勳又認為，面對幼園面試，最重要的是由家長作為第一位老師，透過日常生活細節，讓小朋友自然地學習：「譬如去到巴士站，睇到一條排隊人龍，我哋應該同小朋友講，要喺隊尾跟住排隊；又譬如小朋友喺人群裹面蕩失路，你會點做？呢啲例子多不勝數，面試班都係針對呢啲情景，教小朋友解難。」說得白一點，就是身教。
既然身教便可以，那為何還要去報面試班？唐少勳說，其實是出於家長沒有耐性教小朋友：「媽媽教唔掂叫爸爸教，過一陣爸爸又教到心煩，叫返媽媽教，所以佢哋寧願選擇畀人哋教，因為佢總覺得人哋教比自己教好。」唐少勳強調，最重要是家長要有優質時間跟孩子相處，循循善誘，讓孩子在不知不覺中愉快地學習，建立到自信後，自然成功在望。
