踏入農曆七月，月餅廣告湧現，街頭巷尾都見它。只是，雙黃四黃蓮蓉豆沙、金腿伍仁綠茶冰皮，都是大人們的事。舊時的小朋友，別有所愛。一隻隻烤得焦燶的豬仔，插在小巧的花籠內。像玩意，似公仔，逗人喜愛，惹人垂憐。只是，這趣致的豬籠餅，是個附送品，賣不了幾個銀錢。在功利的世界裏，不符合經濟原則，漸沒人做，漸被遺忘。慶幸，遺忘並沒淨盡。就在街口轉角處，柳暗花明又一村。兩個有心人，仍默默的做，童年現在也可愛，一年一度燕歸來。
月餅手工製
拐斜路走上西營盤第二街，一間叫華爾登的街坊餅店，擺滿了麵包、放滿了宣傳，招徠着路人。門前上方，有一撮撮五顏六色的東西，迎風高懸，進來的人，卻沒有幾個留意到。
睇真點，五顏六色的東西，原來是一個個迷你膠花藍和膠籠，綴了花朵，雕了花紋，強烈的節日喜慶感，悠然而生：「哦！呢啲係裝豬仔餅嘅膠籠，淘寶都冇呀！香港剩得一間批發，我年年同佢訂二百個，就到八月十五就掛出嚟，就快整月餅啦嘛！」店裏櫃枱前的小姐說。
她是孫芷玲，洋名Naomi，是華爾登餅店太子女。華爾登餅店由她爸媽創立，至今已有34年歷史，期間經歷幾次搬遷，三年前從皇后大道西搬到現址，卻一直紮根在西區，與西區街坊有份特別深厚的感情。
紮根西區街坊店
「哎吔！街坊食慣咗，唔可以搬太遠架。有啲阿婆專登撐樓梯都要上嚟幫襯架。」燙了一頭曲髮的孫太拿着湯來給女兒，說完便逕自走進舖後餅房開工。
自從丈夫過身後，她就肩負起做餅的重責。每年臨近中秋前一個月左右，孫太便開工做月餅：「我哋嘅月餅唔同出便嗰啲，出面大廠量大，好多做定先，我哋即時做，冇防腐劑，最多放一個月左右就要食，唔係就要放雪櫃。」
不能預早做，所以產量有限，款式也是有限的。傳統蓮蓉、豆沙、金腿、伍仁有。新派獨創的綠茶豆沙蛋黃月都有。為了緊隨潮流，也推出迷你系列，已是小店能應付的極限了。
月餅都是手工製作，用麥芽糖水、麵粉、鹼水開好搓成餅皮，蓮蓉和蛋黃也裹好一團團，包好、捏實，壓進餅模內，用指力按擠均勻，拿餅模往枱邊一敲。咯~~咯，一個玲瓏剔透的月餅就出來了。
「年紀大喇，膊頭勞損，唔可以全部用木模做架喇，近年都會用膠模代替喇。」孫太說。
絕種豬籠餅
月餅會用膠模代替，但有一樣東西，卻仍堅持用木模。
「嗱！呢啲豬仔餅就係用番木模做，因為量唔多，木模做靚啲。」她說。
對八、九十後的年輕人來說，也許要花少許時間解釋一下甚麼是豬仔餅。
豬仔餅又稱豬籠餅，舊時製餅師傅烤月餅，為了測試爐溫是否足夠，會先把不包餡的麵糰，扔進爐中烤烘，作正式烤月餅前的測試。後來有人把這塊麵糰印成小豬模樣，烤好了，放入竹籠內，當作贈品，送給買月餅的客人。由於造型得意，豬仔餅成為小朋友搶着要的禮物，妹仔大過主人婆，也為中秋節添了幾分童趣。
懷舊木模堅持手製
「其實唔止豬仔架！嗱！好似魚仔啦、雞仔啦！仲有壽星公架！不過個模唔知去咗邊度咯！」孫太拿着一個個豬仔餅餅模，如數家珍，在案板上列陣。
看她的木印模，個個身經百戰，其中一個豬仔模，木色深沉，發亮發黑，模邊還留下經年累月敲打的花痕，最古老、最有味道。
「呢個幾十年架喇！本地廠做架，襟啲靚啲，印出嚟啲紋都清楚啲架！」孫太拿着那古舊木模說。
做豬仔餅很簡單，麵糰搓好，壓印在木模中，猛力朝枱邊一敲一褪，一隻俯伏的小豬便現形。如是者，小豬一隻接一隻，在烤盤排好，髹上蛋漿，就可以入爐了。
「間唔時轉下個盤，等佢烤得均勻啲，烤三四個字就得喇！」孫太說。
烤好的豬仔餅，金黃啡褐，一出爐，香氣乘着熱氣四竄，引得人猛吞口水。孫太做完豬仔，又去做魚仔，還有大魚和大豬，彷彿連自己也童心未泯。
「係喎！做呢啲係好開心個噃，睇到個樣咁得意都開心啦！」芷玲說。
回過熱氣的豬仔餅，放進花花膠籠裏，吊起，一串串的，掛在店裏。像節日公告，告訴匆匆路人，佳節近了，是時候放慢腳步，買盒月餅，討個豬籠，回家和家人飲茶吃餅賞月光，一年一度，共享天倫。
文：譚偉健 圖：譚建章
華爾登餅店
地址：西營盤第二街120號地下1號舖
電話：2915 2263
營業時間：6:50am-7:30pm
